Hindistan neft emalı zavodları ABŞ sanksiyalarının müvəqqəti yumşaldılmasından sonra alınan İran nefti üçün hesablaşmaları Çin yuanı ilə aparır. Ödənişlər ICICI Bank vasitəsilə həyata keçirilir.
Reuters-in mənbələrə istinadən yaydığı məlumata görə, ABŞ Maliyyə Nazirliyi martın 20-də verilmiş müvəqqəti lisenziya ilə tankerlərə yüklənmiş İran neftinin alınmasına icazə verib. Bu qərar bazara təxminən 140 milyon barel neft çıxarmağa imkan yaradıb və lisenziya 19 aprelədək qüvvədədir.
Məlumata görə, Indian Oil Corporation 2 milyon barel İran nefti alıb. “Jaya” tankerinə yüklənmiş bu partiyanın dəyəri təxminən 200 milyon dollar olub.
Bundan əlavə, Reliance Industries üçün İran nefti daşıyan dörd gəminin Hindistan limanlarına daxil olmasına icazə verilib.
Ödəniş mexanizminə əsasən, ICICI Bank vəsaitləri Şanxaydakı filialı vasitəsilə yuanla satıcıların hesablarına köçürür. Bildirilir ki, Indian Oil yükün dəyərinin təxminən 95%-ni tanker Hindistan sularına daxil olduqdan sonra ödəyib.
Ekspertlər bu sxemi qeyri-adi hesab edir. Adətən Hindistan şirkətləri sanksiya tətbiq olunan ölkələrdən alınan neftin ödənişini çatdırılma və ya boşaldılma zamanı həyata keçirir. Bununla belə, belə əməliyyatlarda yuan tez-tez hesablaşma valyutası kimi istifadə olunur.
Bu, son yeddi ildə Hindistanın İran neftini ilk dəfə alması kimi qiymətləndirilir. 2019-cu ildən bəri Hindistan sanksiyalar səbəbindən İran neftindən imtina etmişdi, həmin dövrdə əsas alıcılar əsasən Çində fəaliyyət göstərən müstəqil neft emalı zavodları olub.
MONETAR.AZ
