2018-ci ildə Birləşmiş Millətlər Təşkilatının Baş Assambleyasının qərarı ilə iyunun 3-ü Ümumdünya Velosiped Günü elan olunub. Bu tarix hər il dünyanın müxtəlif ölkələrində velosipedin sağlam həyat tərzinə və ətraf mühitin qorunmasına verdiyi töhfələri diqqətə çatdırmaq məqsədilə qeyd edilir.
Velosiped sadə, əlçatan və ekoloji cəhətdən təmiz nəqliyyat vasitəsi hesab olunur. Mütəxəssislərin fikrincə, müntəzəm velosiped sürmək ürək-damar sisteminin fəaliyyətini yaxşılaşdırır, əzələləri gücləndirir və insanların fiziki fəallığını artırır. Eyni zamanda, sağlam həyat tərzinin formalaşmasına və bir sıra xəstəliklərin riskinin azalmasına kömək edir.
Ümumdünya Velosiped Günü münasibətilə bir çox ölkələrdə olduğu kimi, Azərbaycanda da müxtəlif maarifləndirici və idman tədbirləri təşkil olunur. Paytaxt Bakıda və regionlarda keçirilən veloyürüşlər sağlam həyat tərzinin təbliği, eləcə də ekoloji təmiz nəqliyyat vasitələrindən istifadənin təşviqinə xidmət edir.
Qeyd edək ki, velosipeddən istifadənin genişləndirilməsi şəhərlərdə nəqliyyat sıxlığının azalmasına, havanın daha təmiz qalmasına və dayanıqlı inkişaf məqsədlərinin həyata keçirilməsinə dəstək verir. Bu baxımdan Ümumdünya Velosiped Günü cəmiyyətin diqqətini sağlamlıq və ekologiya məsələlərinə yönəldən əlamətdar günlərdən biri hesab olunur.
MONETAR.AZ
