Bir kiloqram qida məhsulunun istehsalı üçün tələb olunan torpaq sahəsi məhsuldan məhsula ciddi şəkildə fərqlənir. Ən çox torpaq tələb edən məhsul isə qoyun və quzu ətidir.
Monetar.az xəbər verir ki, “Our World in Data”ın məlumatları əsasında hazırladığı reytinqdə 15 qida məhsulunun istehsalı üçün tələb olunan torpaq sahəsi müqayisə edilib.
Məlumata görə, 1 kiloqram quzu və qoyun əti istehsalı üçün təxminən 369,7 kvadratmetr torpaq tələb olunur. Bu göstəriciyə görə mal əti ikinci yerdədir. Bir kiloqram mal əti istehsalına 325,8 kvadratmetr torpaq sərf olunur.
Digər məhsullar üzrə göstəricilər belədir:
Pendir – 87,7 kvadratmetr
Tünd şokolad – 69 kvadratmetr
Südçülük təsərrüfatından əldə edilən mal əti – 43,4 kvadratmetr
Qəhvə – 21,9 kvadratmetr
Donuz əti – 17,6 kvadratmetr
Çərəzlər – 13,2 kvadratmetr
Quş əti – 12,4 kvadratmetr
Yerfındığı – 9,2 kvadratmetr
Süd – 9 kvadratmetr
Fermada yetişdirilən balıq – 8,5 kvadratmetr
Noxud – 7,6 kvadratmetr
Yumurta – 6,4 kvadratmetr
Ən az torpaq tələb edən məhsullar sırasında buğda və çovdar yer alıb. Bir kiloqram buğda və çovdarın istehsalı üçün təxminən 4,1 kvadratmetr torpaq tələb olunur.
Beləliklə, bir kiloqram quzu və qoyun əti istehsalına tələb olunan torpaq sahəsi buğda və çovdarın istehsalına tələb olunan ərazidən təxminən 90 dəfə çoxdur.
Müqayisə göstərir ki, heyvan mənşəli məhsulların bir hissəsinin istehsalı bitki mənşəli məhsullarla müqayisədə əhəmiyyətli dərəcədə daha çox torpaq resursu tələb edir. Bu fərq ərzaq istehsalının ətraf mühitə və torpaq ehtiyatlarına təsiri baxımından da diqqət çəkən göstəricilərdən biridir.
