ABŞ-da təbii qaz fyuçersləri xarici və daxili amillərin təsiri ilə qiymət artımı nümayiş etdirib. Hasilatçıların uzun həftəsonu dövründə istehsalı müvəqqəti azaltması və Meksika körfəzi sahilində yerləşən terminallara mayeləşdirilmiş təbii qaz (LNG) tədarükünün artması birjada qiymətləri yuxarı doğru itələyib. Bloomberg-in məlumatına görə, bu artım daxili tələb və ixrac balansındakı dəyişikliklərlə birbaşa bağlıdır.
Əvvəlki dövrlərdə bəzi obyektlərin mövsümi texniki qulluq (təmir) işləri səbəbindən tam gücü ilə işləməməsi səbəbindən artıq qaz daxili bazara yönəlirdi. Hazırda isə infrastrukturun bərpası ixrac tempini yenidən artırıb.
Nyu-York əmtəə birjasında (NYMEX) qaz müqavilələrinin dəyəri növbəti ayların proqnozlarına uyğun olaraq yüksəlib.
Qiymət dinamikası
- İyun fyuçersləri: +1,9% artaraq 2,963 dollar/MMBtu
- İyul fyuçersləri: +1,8% artaraq 3,074 dollar/MMBtu
- İyun müqavilələrinin müddəti 27 mayda başa çatır
Qlobal ixracın artmasına baxmayaraq, ABŞ-ın daxili bazarındakı meteoroloji vəziyyət qiymətlərin kəskin sıçrayışının qarşısını alır. Sinoptiklərin proqnozlarına görə, ABŞ-ın sıx məskunlaşmış şərq bölgələrində və Kaliforniyada yay mövsümünün əvvəlində temperaturun normadan aşağı olacağı gözlənilir.
Sərin hava şəraiti yaşayış evlərində və ofislərdə kondisionerlərdən istifadəni azaldacaq. Bu isə birbaşa olaraq qazla işləyən elektrik stansiyalarının daxili mavi yanacaq istehlakını və ümumi tələbi zəiflədən əsas amildir.
ABŞ-ın təbii qaz bazarı hazırda ziddiyyətli dalğaların təsirindədir. Bir tərəfdən mayeləşdirilmiş qaz (LNG) terminallarının tam gücü ilə işləməsi və qlobal ixrac tələbi qiymətləri dəstəkləyir, digər tərəfdən isə daxili bazarda mövsümi istehlakın zəif proqnozlaşdırılması qiymətləri müəyyən çərçivədə saxlayır.
MONETAR.AZ
