JPMorgan Chase-ın baş icraçı direktoru Ceymi Daymon bildirib ki, ABŞ öz hərbi və iqtisadi gücünü qorumaq üçün “daha güclü olmalıdır” və bu məqsədlə 1 trilyon dollardan çox vəsaitin yönəldilməsi planlaşdırılır.
Daymon bu fikirləri səhmdarlara ünvanladığı illik məktubunda qeyd edib: “Düzgün siyasət və qətiyyətli addımlarla ABŞ ən güclü orduya və iqtisadiyyata sahib olaraq azadlığın dayağı və demokratiyanın təminatçısı olaraq qalacaq.” O əlavə edib ki, “heç bir ölkənin uğur üçün ilahi hüququ yoxdur”.
Qlobal risklər və çağırışlar
48 səhifəlik məktubun ən geniş bölməsi ABŞ və dünya qarşısında duran “kritik məsələlərə” həsr olunub. Buraya qlobal münaqişələr də daxildir. Dimon qeyd edib ki, İran ətrafında gedən müharibə gələcəkdə neft və xammal qiymətlərində yeni şoklar yarada bilər.
O, həmçinin Avropanı hazırda “yanlış istiqamətdə” hərəkət edən region kimi qiymətləndirərək, iqtisadi və hərbi islahatlar qarşılığında geniş miqyaslı azad ticarət razılaşmasına çağırıb.
Yeni təşəbbüslər və investisiya planları
JPMorgan Chase yaxın zamanda “American Dream Initiative” proqramını işə salıb. Bundan əlavə, ötən ilin oktyabrında bank növbəti on il ərzində iqtisadi təhlükəsizlik və dayanıqlılığı dəstəkləyən sahələrə 1,5 trilyon dollar ayırmağı nəzərdə tutan təşəbbüs elan edib.
Maliyyə riskləri və bazar narahatlıqları
Daymon bildirib ki, özəl kredit bazarı sistemli risk yaratmaya bilər, lakin yüksək borclanma səviyyəsinə malik kreditlər üzrə itkilər gözləniləndən çox ola bilər. O, bu sahədə şəffaflığın zəif olduğunu vurğulayıb.
Həmçinin, o qeyd edib ki, özəl kapital şirkətləri bazarların əlverişli olmasına baxmayaraq şirkətləri birjaya çıxarmaqda passivdir. Aktivlərin saxlanma müddəti orta hesabla 7 ilə çatıb ki, bu da əvvəlki dövrlərlə müqayisədə iki dəfə çoxdur.
Texnologiya və işçi qüvvəsi
Ceymi Daymon süni intellektin tətbiqinin elektrik və ya internet kimi əvvəlki texnologiyalardan daha sürətli yayılacağını bildirib və bankın bu sahədə aktiv mövqe tutacağını qeyd edib.
Eyni zamanda, bankın Nyu-Yorkdakı işçi sayı azalarkən, Texas ştatında əməkdaşların sayı artmaqdadır. Daymon yüksək vergiləri Nyu-Yorkun əsas problemlərindən biri kimi göstərib.
MONETAR.AZ
