Bernstein analitiklərinin fikrincə, istehlakçılar üçün nəzərdə tutulan süni intellekt (Sİ) agentləri maliyyə xidmətləri sahəsində uzun müddətdir mövcud olan bir sıra problemlərin həllinə kömək edə bilər. Bununla belə, istifadəçi etibarı, məlumatlara çıxış və tənzimləmə onların geniş yayılmasının qarşısındakı əsas maneələr olaraq qalır.
Sİ-agentləri ilə bağlı müzakirələr Meta Muse tətbiqinin sürətli populyarlıq qazanmasından sonra daha da intensivləşib. Tətbiqin yüklənmə sayı 2,8 milyona çataraq ABŞ-ın App Store platformasında ən populyar tətbiqə çevrilib.
Bernstein analitikləri bildirirlər ki, Muse istifadəyə verildikdən sonra istehlakçı davranışındakı dəyişikliklərə həssas olan maliyyə şirkətlərinin səhmləri 6–14 faiz ucuzlaşıb. Bu qrupda ipoteka kreditorları, brokerlər, regional banklar və sığorta şirkətləri yer alır.
Sİ-agentləri sığorta polislərini müqayisə etmək, depozitləri bir bankdan digərinə köçürmək, broker hesablarındakı nağd vəsaiti optimallaşdırmaq, kredit kartlarının bonus və təkliflərini müqayisə etmək kimi prosesləri avtomatlaşdıra bilər. Bu isə müştəri loyallığına, depozit gəlirlərinə, pul köçürmələrinə, sığorta müqavilələrinin yenilənməsinə və maliyyə məsləhətlərinə təsir göstərə bilər.
Sİ-agentlərinin belə əməliyyatları həyata keçirməsi üçün yalnız texnoloji imkanlar kifayət etmir. İstehlakçı maliyyə qərarlarını agentə həvalə etməyə hazır olmalı, maliyyə xidmətləri göstərən qurumlar isə agentlərə hesablar, qiymətlər və digər məlumatlara çıxış imkanı verməlidirlər.
Maliyyə institutları autentifikasiya, şəxsiyyətin yoxlanılması və məhsulların əldə edilməsinə icazə kimi proseslər üzərində nəzarəti saxlayır. Bankların məlumatlara çıxış müqabilində Sİ-agentlərindən ödəniş tələb etməsi də mümkün ssenarilərdən biri hesab olunur.
İstifadəçi etimadı da mühüm amildir. TD Bank sorğusuna əsasən, amerikalıların 55 faizi maliyyələrinin idarə edilməsində Sİ-dən istifadə edir. Bir il əvvəl bu göstərici 10 faiz olub. Bununla belə, respondentlərin yalnız 18 faizi mühüm maliyyə qərarlarını müstəqil şəkildə Sİ-yə həvalə etməyə hazır olduğunu bildirib.
Bundan əlavə, istehlakçı razılığı, maliyyə məsləhətlərinin verilməsi, lisenziyalaşdırma və Sİ-agentinin yanlış qərarı zamanı məsuliyyətin kimə aid olması kimi məsələlər tənzimləmə baxımından əlavə suallar yaradır.
Ödəniş sektoru Sİ-agentlərinin geniş yayılmasından digər maliyyə xidmətləri sahələrinə nisbətən daha çox faydalana bilər. Agentlər tərəfindən həyata keçirilən əməliyyatların sayı artdıqca, Visa və Mastercard kimi şirkətlərin mövcud dələduzluqdan qorunma sistemləri, mübahisələrin həlli mexanizmləri və tokenləşdirmə texnologiyaları daha böyük əhəmiyyət qazana bilər.
Ödəniş prosessorları həmçinin şirkətlərə müxtəlif Sİ platformaları və protokolları ilə işləməyə imkan verən həllər təqdim etməklə yeni gəlir mənbələri əldə edə bilərlər. Məsələn, Adyen artıq bizneslərin Sİ əsaslı kommersiya sistemlərinə qoşulması üçün alətlər təqdim edir.
Analitiklər hesab edirlər ki, bu keçid qısa müddətdə baş verməyəcək. İstehlakçı etibarı, məlumatlara çıxış və tənzimləmə mühiti Sİ-agentlərinin maliyyə xidmətləri sektoruna təsirinin miqyasını müəyyən edən əsas amillər olacaq.
MONETAR.AZ
