Vladimir Putin bildirib ki, Rusiya və Misir arasında “taxıl və enerji mərkəzi (hub)” yaradılması imkanları müzakirə oluna bilər. Bu barədə Reuters məlumat yayıb.
Rusiya lideri bu ideyanı Kremldə Badr Abdelatty ilə görüş zamanı səsləndirib və müzakirə üçün “çoxlu maraqlı ideyaların” olduğunu qeyd edib. Abdelatty isə Misirin Rusiya təşəbbüslərini müsbət qarşıladığını bildirib.
Rusiya Qərbin tətbiq etdiyi sanksiyalar fonunda enerji və xammal ixracını yerləşdirmək üçün yeni yollar axtarır. Misir isə Rusiya xammalının emalı və daşınmasında getdikcə daha vacib rol oynaya bilər və Afrika ilə Yaxın Şərqə yönələn tədarüklər üçün logistika və saxlama mərkəzi kimi çıxış edə bilər.
Misir dünyanın ən böyük buğda idxalçısıdır və Rusiya buğdasının əsas alıcılarından biridir. Dəmir yolu operatoru Rusagrotrans-ın qiymətləndirməsinə görə, cari mövsümdə Misir təxminən 7,6 milyon ton Rusiya taxılı alıb ki, bu da ötən ilin səviyyəsinə yaxındır.
Putin bildirib ki, Rusiya hökumətinə Misirlə, xüsusilə ərzaq və ilk növbədə taxıl tədarükü ilə bağlı məsələləri işləyib hazırlamaq tapşırılıb. O, ötən ilin yaxşı məhsulu sayəsində tədarükdə problemlərin gözlənilmədiyini əlavə edib.
Misir həmçinin Rusiya benzininin əsas idxalçılarından biridir və Rusiyanın benzin ixracını iyulun sonunadək qadağan etməsi bu ölkəyə təsir göstərə bilər.
