Alüminium qiymətləri, Donald Trumpın polad və alüminium idxalına tətbiq olunan bəzi tarifləri nəzərdən keçirib azaltmağı planlaşdırması barədə xəbərlərdən sonra düşüb. Bu barədə Financial Times mənbələrinə istinadən məlumat yayıb.
ABŞ hakimiyyəti rüsumlara tabe olan məhsullar siyahısını yenidən nəzərdən keçirir və bir sıra məhsulları siyahıdan çıxarmağı, həmçinin siyahının daha da genişləndirilməsini dayandırmağı planlaşdırır. Bu siyasət dəyişikliyinin səbəbi sərt tariflərin istehlakçılara zərər vuracağına dair narahatlıqdır.
Bu xəbərlər fonunda London Metal Exchange-də alüminiumun qiyməti 1,3% ucuzlaşaraq ton başına 3 058,50 dollar səviyyəsinə düşüb.
Xatırladaq ki, ötən ilin iyun ayında Tramp polad və alüminium idxalına tətbiq olunan rüsumları 50%-ə qədər artırmışdı. Bu maneələrin tətbiqi və gələcək barədə qeyri-müəyyənlik ABŞ-da metal təchizatında ciddi fasilələrə və dünya bazarlarında sarsıntılara səbəb olmuşdu.
MONETAR.AZ
