Bitcoin bu gün kəskin satış dalğasından sonra qismən sabitləşərək 76 min dollar həddinin üzərində ticarət olunub. Bununla belə, ABŞ-da spot Bitcoin birja fondlarından (ETF) vəsait çıxışının davam etməsi kriptovalyutanın qiymətindəki bərpa ilə institusional investorların tələbatı arasındakı fərqi üzə çıxarıb.
Bakı vaxtı ilə saat 12:13-ə olan məlumata görə, Bitcoin 0,59% bahalaşaraq 76 103,2 dollar səviyyəsinə yüksəlib.
Cümə günü erkən ticarət sessiyasında kriptovalyuta bazarında ciddi eniş qeydə alınıb. ABŞ-da aralıq seçkilərdən sonra müşahidə olunan yüksəlişin təsirini itirməsi, eləcə də süni intellekt sahəsində xərclər və məlumat mərkəzlərinin tikintisi ilə bağlı narahatlıqlar texnologiya səhmlərinin kütləvi satışına səbəb olub. Bu vəziyyət investorların risk iştahını zəiflədərək Bitcoin-ə də təzyiq göstərib.
Nəticədə aparıcı kriptovalyuta 24 saat ərzində təxminən 5,2% dəyər itirib.
Qiymət enişi törəmə alətlər bazarında da böyük həcmdə mövqelərin bağlanmasına gətirib çıxarıb. Həmin 24 saat ərzində 1,27 milyard dollardan çox mövqe likvidasiya edilib. Bunun 1,1 milyard dollardan artıq hissəsi Bitcoin-in bahalaşacağına mərc edən investorların uzun mövqelərinin (long) payına düşüb.
Qiymətin aşağı düşməsindən sonra institusional investorların bazara dəstəyi zəif qalıb. ABŞ-da spot Bitcoin ETF-lərindən xalis kapital axını cümə günü ardıcıl ikinci sessiyada davam edərək 411,9 milyon dollar təşkil edib.
Ən böyük vəsait çıxışı BlackRock-un iShares Bitcoin Trust fondunda qeydə alınıb. Fondun investorları 403 milyon dollar geri çəkiblər. Fidelity fondlarından isə 42,8 milyon dollar həcmində kapital çıxışı baş verib.
Noyabr ayının əvvəlindən cümə gününədək spot Bitcoin ETF-lərindən ümumi xalis kapital axını təxminən 1,28 milyard dollara çatıb. Bu müddətdə fondlar üzrə yalnız çərşənbə günü müsbət kapital axını qeydə alınıb.
Kriptovalyuta bazarına təsir göstərən digər amil tənzimləyici təzyiqlərin artmasıdır. ABŞ Maliyyə Nazirliyinin rəsmilərinin MEXC kriptovalyuta birjasının ABŞ maliyyə institutlarına çıxışını məhdudlaşdırmaq üçün tədbirlər gördüyü bildirilir.
İddialara əsasən, birja 2021–2026-cı illər ərzində sanksiyalardan yayınma və digər qanunsuz fəaliyyətlərlə əlaqəli ən azı 16 milyard dollar həcmində şübhəli əməliyyat həyata keçirib.
Bitcoin-in 76 min dollar üzərində möhkəmlənməyə çalışmasına baxmayaraq, ETF-lərdən davam edən kapital axını, törəmə alətlər bazarındakı likvidasiyalar və tənzimləyici risklər kriptovalyuta bazarında qeyri-müəyyənliyi artırır.
MONETAR.AZ
