Bu həftə qlobal iqtisadiyyat üçün mühüm hadisələrlə yadda qalacaq. Ekspertlərin fikrincə, bazarların əsas diqqəti geosiyasi proseslər, mərkəzi bank qərarları və iri texnologiya şirkətlərinin maliyyə nəticələrinə yönələcək.
Bildirilir ki, ABŞ-İran münasibətləri ətrafında mümkün razılaşma və ya ticarət güzəştləri qlobal iqtisadi gözləntilərə birbaşa təsir göstərə bilər. Münaqişənin səkkizinci həftəsinə daxil olduğu bir vaxtda hər hansı yumşalma bazarlarda müsbət siqnal kimi qiymətləndirilir.
Həftə ərzində əsas diqqət həmçinin texnologiya nəhənglərinin maliyyə hesabatlarına yönələcək. Microsoft, Amazon, Apple, Alphabet və Meta kimi şirkətlərin nəticələri xüsusilə süni intellektə yatırımlar fonunda investorlar üçün mühüm əhəmiyyət daşıyır.
Pul-kredit siyasəti sahəsində isə bir sıra vacib qərarlar gözlənilir. ABŞ Federal Ehtiyat Sistemi faiz dərəcələri ilə bağlı qərar verəcək. Bu iclasın qurumun rəhbəri Jerome Powell üçün son toplantılardan biri ola biləcəyi qeyd olunur.
Eyni zamanda, Avropa Mərkəzi Bankı, İngiltərə Bankı və Yaponiya Bankı da faiz siyasəti ilə bağlı qərarlarını açıqlayacaq.
Makroiqtisadi göstəricilər baxımından isə ABŞ və Avrozonada birinci rüb üzrə ÜDM (Ümumi Daxili Məhsul) məlumatları dərc olunacaq. Bundan əlavə, Avrozonada və Avstraliyada inflyasiya göstəriciləri açıqlanacaq.
Asiya regionunda isə diqqət Çin Xalq Nümayəndələri Yığıncağının Daimi Komitəsinin iclasına və ölkə üzrə sənaye və rəsmi PMI (işgüzar aktivlik indeksi) göstəricilərinə yönələcək.
Analitiklər hesab edir ki, qarşıdakı həftə açıqlanacaq məlumatlar və qərarlar qlobal bazarlarda istiqamətin müəyyənləşməsində həlledici rol oynaya bilər.
MONETAR.AZ
