Qlobal mis qiymətləri İran ətrafındakı vəziyyətlə bağlı geosiyasi gərginliyə baxmayaraq artmaqda davam edir. Mining.com portalının məlumatına görə, metalın qiyməti artıq ton başına 13 min ABŞ dollarını ötərək tarixi maksimumlara yaxınlaşıb.
Xüsusilə, may ayı üzrə mis fyuçersləri New York Mercantile Exchange-də hazırda təxminən 13 480 dollar/ton səviyyəsində ticarət olunur.
Xatırladaq ki, yanvarın sonunda qiymətlər demək olar ki, 14 min dollar həddinə çatmışdı, lakin daha sonra münaqişənin kəskinləşməsi fonunda müvəqqəti olaraq azalmışdı. Martın sonundan etibarən isə kotirovkalar yenidən yüksəlişə keçib.
Artımın əsas səbəbi kimi ekspertlər, ilk növbədə Çində olmaqla, misəritmə müəssisələrinin fəaliyyətinin genişlənməsini göstərirlər. SAVANT Global Copper Smelting Index məlumatlarına əsasən, hazırda zavodların yüklənmə səviyyəsi yanvar ayı ilə müqayisədə daha yüksəkdir. Əgər həmin dövrdə istehsal güclərinin təxminən 14,3%-i boş qalırdısa, indi bu göstərici 11,7%-ə düşüb. Çində isə boş qalan güclər cəmi 3,9% təşkil edir.
Eyni zamanda, İranda münaqişənin başlanmasından sonra iki misəritmə zavodunun fəaliyyəti dayandırılıb. Avropada boş güclərin səviyyəsi 6%-dən çox, Şimali Amerikada isə 32%-dən artıqdır.
Uzunmüddətli perspektivdə mis qiymətləri sabit artım nümayiş etdirir. Üç il əvvəl metalın qiyməti 8–9 min dollar/ton aralığında olduğu halda, 2025-ci ilin ortalarından etibarən bu göstərici davamlı olaraq 10 min dolları keçir. Əsas amillər sırasında bərpa olunan enerji sektorunun sürətli inkişafı və elektrik avtomobillərinin istehsalının artması yer alır.
