BYD Co Kanadada diler mərkəzləri açmaq üçün danışıqlar aparır. Şirkət ilkin mərhələdə Greater Toronto Area regionundan bazara daxil olmağı nəzərdən keçirir.
Məlumata görə, BYD bir il ərzində 20 diler mərkəzi yaratmağı planlaşdırır. Genişlənmə mərhələsində isə şəbəkə Torontodan sonra Vankuver, Monreal və Kalqari kimi iri şəhərləri əhatə edə bilər.
Bu addım Kanada hökumətinin Çin istehsalı elektromobillər üçün yeni idxal kvotası tətbiq etməsindən sonra gündəmə gəlib. Qərara əsasən, tariflər 100%-dən 6,1%-ə endirilib və ilkin mərhələdə 49 000 avtomobilin idxalına icazə verilir.
Kanada bazarına maraq göstərən təkcə BYD deyil. Chery Automobile də ölkəyə daxil olmağa hazırlaşır və yerli tərəfdaşlarla danışıqlar aparır.
Bu təşəbbüs Mark Karney hökumətinin elektromobil təklifini genişləndirmək strategiyasının bir hissəsidir. Bununla belə, Çin istehsalı ucuz elektromobillərin idxalı ölkədə siyasi baxımdan həssas mövzu olaraq qalır. Yerli avtomobil istehsalçıları bildirirlər ki, bu cür rəqabət daxili sənayeyə təzyiq göstərə bilər.
MONETAR.AZ
