Coca-Cola Co Costa Coffee şəbəkəsi üzərində tam mülkiyyəti qoruyub saxlayacaq. Eyni zamanda brendin Çindəki əməliyyatlarını yenidən qiymətləndirəcək. Bu barədə dünən Bloomberg şirkətin maliyyə direktoru (CFO) Con Mörfiyə istinadən xəbər verib.
Daha əvvəl alkoqolsuz içkilər nəhəngi 2018-ci ildə təxminən 5 milyard dollara aldığı Britaniya kafe şəbəkəsinin satışı ilə bağlı potensial təklifləri nəzərdən keçirmişdi. Biznesdəki çətinliklərə baxmayaraq, Coca-Cola bu aktivi satmamaq qərarına gəlib.
“Biz Costa-nı portfelimizdə 100% mülkiyyətdə saxlamaq qərarına gəldik,” deyə Coca-Cola-nın maliyyə direktoru Con Mörfi Bloomberg-ə müsahibəsində bildirib. “Hazırda Costa ilə bağlı onu daha yaxşı işlək vəziyyətə gətirməkdən başqa hər hansı addım atmaq planımız yoxdur.”
Mörfi qeyd edib ki, Costa Coffee üçün əsas bazarların bəzilərində nəticələr müsbət olsa da, Çindəki biznes “gözlədiyimizdən daha mürəkkəb” olub. O vurğulayıb ki, Costa-nın Çin bazarından mümkün çıxışı ilə bağlı hələlik heç bir qərar qəbul edilməyib.
“Bu, portfelimizin nəzərdən keçirməyə davam etdiyimiz aspektlərindən biridir,” deyə Mörfi əlavə edib. “2026-cı il ərzində Çindəki biznesi diqqətlə təhlil edəcəyik.”
MONETAR.AZ
