Forbes jurnalının 2026-cı il üçün hazırladığı “Dünyanın milyarderləri” siyahısına görə, milyarderlərin ən çox yaşadığı ölkə yenə də Amerika Birləşmiş Ştatları olub. Siyahının son yenilənməsinə əsasən bu ölkədə 989 milyarder qeydə alınıb.
Məlumata görə, ikinci yerdə 610 milyarderlə Çin, üçüncü yerdə isə 229 milyarderlə Hindistan qərarlaşıb.
Hesabata əsasən, son bir il ərzində dünyada 390 yeni milyarder meydana çıxıb. Bu isə demək olar ki, hər gün bir yeni milyarderin ortaya çıxması deməkdir. Nəticədə dünyada milyarderlərin ümumi sayı 3400-ü keçib.
2026-cı ildə siyahıya ilk dəfə Əfqanıstan və Pakistan vətəndaşları da daxil edilib. Əfqan əsilli 63 yaşlı iş adamı Mirvais Əzizi Dubayda fəaliyyət göstərən daşınmaz əmlak sahəsində uğur qazanaraq milyarder olub. Pakistanlı 26 yaşlı Sualeh Asif isə ABŞ-da Massaçusets Texnologiya İnstitutundan olan dostları ilə birlikdə “Cursor” adlı süni intellekt proqramlaşdırma alətini yaradaraq sərvət əldə edib.
Milyarderlərin sayına görə növbəti yerlərdə 212 milyarderlə Almaniya və 147 milyarderlə Rusiya qərarlaşıb.
2026-cı ildə siyahıya yeni daxil olan tanınmış simalar arasında müğənni Beyonse Noulz-Karter, tennis ulduzu Rocer Federer, reper Doktor Dre və kinorejissor Ceyms Kemeron da var.
Qadın milyarderlər arasında diqqət çəkən yeni adlardan biri Cou Syaopin olub. O, Çində avtomobil işıqlandırma sistemləri istehsal edən şirkətin həmtəsisçisi kimi 3,8 milyard dollarlıq sərvətlə 2026-cı ilin ən böyük öz zəhməti ilə qazanan qadın milyarderi kimi siyahıya daxil edilib.
Bundan başqa, braziliyalı sahibkar ailəsinin sərvətindən pay alaraq milyarder olan 20 yaşlı Ameli Voyt Treyes dünyanın ən gənc milyarderi hesab olunur.
ABŞ-da fəaliyyət göstərən “Mercor” adlı süni intellekt işə qəbul platformasının həmtəsisçisi Surya Midha isə 22 yaşında dünyanın ən gənc öz zəhməti ilə milyarder olan şəxsi kimi qeyd edilir.
Eyni zamanda braziliyalı sahibkar Luana Lopes Lara 29 yaşında öz zəhməti ilə milyarder olan ən gənc qadın kimi siyahıya daxil olub. O, “Kalshi” adlı proqnoz bazarı platformasının həmtəsisçilərindən biridir.
MONETAR.AZ
