Trend-in məlumatına görə, Azərbaycan 2025-ci ildə 2024-cü illə müqayisədə əmtəə qazının hasilatını 0,5% artırıb.
Azərbaycan Dövlət Statistika Komitəsinin məlumatına əsasən, ötən il təbii qaz hasilatı 50,9 milyard kubmetr təşkil edib, bunun 38,9 milyard kubmetri əmtəə qazının payına düşüb.
Eyni zamanda, təbii qaz hasilatı illik müqayisədə 0,6% artıb. Bu dövrdə xam neftin, o cümlədən əmtəə neftinin hasilatında isə azalma müşahidə olunub.
Belə ki, Azərbaycanda kondensat da daxil olmaqla təxminən 27,7 milyon ton xam neft hasil edilib, bunun 27,6 milyon tonu əmtəə nefti olub. Bununla da Azərbaycan xam neftin (kondensatla birlikdə) hasilatını illik müqayisədə 4,8% azaldıb. Əmtəə neftinin hasilatı da il ərzində 4,8% aşağı düşüb.
Qeyd edək ki, Azərbaycan şelf zonasında əhəmiyyətli qaz ehtiyatlarına malikdir. Qiymətləndirmələrə görə, nəhəng “Şahdəniz” yatağının kəşf edilmiş ehtiyatları 1,2 trilyon kubmetr qaz və 240 milyon ton kondensat təşkil edir.
Bundan başqa, Azərbaycanın karbohidrogen yataqları sırasında “Ümid–Babək” də var. İlkin məlumatlara əsasən, perspektivli “Babək” strukturunun ehtiyatları 400 milyard kubmetr qaz və 80 milyon ton kondensat həcmində qiymətləndirilir.
Digər perspektivli strukturlara gəlincə, “Şəfəq–Asiman” blokunun proqnoz ehtiyatları 500 milyard kubmetr qaz və 65 milyon ton kondensatdır. “Abşeron” yatağından isə birinci mərhələdə 1,5 milyard kubmetr qaz hasil olunur.
