Azərbaycan onilliklər boyu davam edən fasilədən sonra Ermənistana birbaşa məhsul ixracı həyata keçirilib. Dövlət Gömrük Komitəsinin hesabatına görə ixracın əsas hissəsini müxtəlif markalı avtomobil yanacaqları təşkil edir.
Ötən il Azərbaycan Ermənistana 788,8 min ABŞ dolları dəyərində məhsul ixrac edib. Məlumata görə, Ermənistana ixracın əsasını enerji resursları təşkil edir. Proses ötən ilin dekabr ayından etibarən intensivləşib:
2025-ci il dekabrın 18-də Azərbaycandan Ermənistana ilk yanacaq ixracı həyata keçirilib. Həmin tarixdə 1 220 ton Aİ-95 markalı (“Premium”) avtomobil benzini göndərilib.
İxrac prosesi 2026-cı ilin yanvar ayında da davam etdirilib. Yanvarın 9-da Ermənistan Azərbaycandan 1 742 ton Aİ-95 markalı benzin, həmçinin 956 ton dizel yanacağı idxal edib.
Yanvarın 11-də isə daha 979 ton Aİ-92 markalı avtomobil yanacağı Ermənistana çatdırılıb.
Gömrük statistikasında diqqətçəkən digər məqam ticarət dövriyyəsinin tək tərəfli olmasıdır. Ermənistandan Azərbaycana hər hansı məhsulun ixracı qeydə alınmayıb.
İqtisadçılar bu addımı regionda iqtisadi münasibətlərin normallaşması istiqamətində mühüm texniki və siyasi göstərici hesab edirlər. Azərbaycanın enerji resurslarının Ermənistan bazarına daxil olması həm logistik zəncirlərin bərpası, həm də regionda yeni iqtisadi reallıqların yaranması kimi qiymətləndirilir.
MONETAR.AZ
