Rusiya bayrağı altında üzən və təxminən 700 min barel neft daşıyan tanker bugün Kubanın Matansas limanının reyd ərazisinə çatıb. Bu barədə Reuters və gəmi izləmə məlumatları xəbər verir.
Gəmi ABŞ administrasiyasının adaya yanacaq tədarükünü məhdudlaşdırmaq üçün addımlar atmasından sonra ilk iri xam neft partiyasını çatdırmağa hazırlaşır.
Tanker bazar günü axşam saatlarında ABŞ-ın Quantanamo körfəzində yerləşən hərbi-dəniz bazasının yaxınlığından keçərək Kubanın ərazi sularına daxil olub. ABŞ bu yanacaq tədarükünə humanitar səbəblərlə icazə verdiyini bildirib.
“Aframax” sinifli tanker ölkənin supertanker qəbul edən və yanacaq saxlayan ən böyük limanı olan Matansas körfəzinə daxil olub. Gəminin limana çatdığı vaxt yaxınlıqdakı şəhərin böyük hissəsi, eləcə də Kubanın əksər əraziləri elektrik enerjisiz qalıb.
Prezident Migel Dias-Kanelin sözlərinə görə, Kuba son üç ay ərzində heç bir neft tankerini qəbul etməyib. Bu isə 10 milyon əhalisi olan ölkədə tez-tez elektrik kəsintilərinə səbəb olan enerji böhranını daha da dərinləşdirib.
Yanacağın uğurla boşaldılması halında bu tədarük Tramp administrasiyasının artan təzyiqləri fonunda Kuba hökumətinə müəyyən nəfəs alma imkanı verə bilər.
Tanker orta kükürdlü “Urals” markalı Rusiya nefti daşıyır ki, bu da Kubanın köhnəlmiş neft emalı zavodları üçün uyğun hesab olunur.
Eyni zamanda, The Wall Street Journal nəşrinin Donald Trampın İrana qarşı hərbi kampaniyanı Hörmüz boğazı açılmadan belə dayandırmaq ehtimalını müzakirə etdiyini yazmasından sonra bazarlarda qismən bərpa müşahidə olunub. Bu isə münaqişənin gözləniləndən daha tez başa çata biləcəyinə işarə edir.
MONETAR.AZ
