Cənub-Şərqi Asiya Millətləri Assosiasiyası ölkələrində istehsal sektoru mart ayında zəifləmə siqnalları göstərib. S&P Global tərəfindən açıqlanan ASEAN istehsal üzrə biznes aktivliyi indeksi (PMI) fevraldakı rekord 53,8 səviyyəsindən 51,8-ə düşərək sentyabrdan bəri ən aşağı göstəricini qeydə alıb.
Buna baxmayaraq, indeks 50 həddindən yuxarı qalaraq (bu hədd artım ilə daralma arasındakı sərhədi göstərir) regionda artıq doqquz aydır davam edən iqtisadi genişlənmənin qorunduğunu göstərir. Lakin eniş ASEAN-ın ümumi istehsal əlavə dəyərinin 98%-ni təşkil edən yeddi iqtisadiyyatda artım tempinin zəiflədiyini göstərir.
Mart ayında istehsal və yeni sifarişlər fevraldakı sürətli artımla müqayisədə daha yavaş yüksəlib. Yeni sifarişlər avqustdan bəri ən zəif tempdə artıb, istehsal həcminin artımı isə son səkkiz ayın minimumuna enib. Yeni ixrac sifarişləri isə ümumilikdə azalıb.
Şirkətlər bu vəziyyətə genişlənmə planlarını azaltmaqla reaksiya veriblər. Satınalma aktivliyi və məşğulluq cüzi artsa da, əvvəlki aylarla müqayisədə daha zəif dinamika nümayiş etdirib.
Noyabrdan bəri ilk dəfə olaraq hazır məhsul ehtiyatları azalıb, lakin xammal və material ehtiyatları artmaqda davam edib, hərçənd daha aşağı templə.
Xammal xərcləri 2022-ci ilin oktyabrından bəri ən sürətli templə artıb ki, bu da istehsalçıları son üç ilin ən kəskin qiymət artımına getməyə vadar edib. Hər iki qiymət göstəricisi uzunmüddətli orta səviyyəni üstələyib.
Araşdırmaya daxil edilən yeddi ASEAN iqtisadiyyatından dördündə, o cümlədən İndoneziyada istehsal artımı zəifləyib (İndoneziya cüzi fərqlə artım zonasında qalıb).
Növbəti il üçün biznes gözləntiləri ümumilikdə müsbət qalsa da, son dörd ayın minimum səviyyəsinə enib.
S&P Global Market Intelligence iqtisadçısı Maryam Baluch bildirib ki, mart ayı məlumatları Yaxın Şərqdəki müharibənin ASEAN iqtisadiyyatlarına tələb, istehsal və biznes gözləntiləri kanalları vasitəsilə ilk təsirlərini göstərməyə başlayıb.
