Qlobal investisiya bankı Goldman Sachs, Brexit referendumunun 10 illiyi münasibətilə London iqtisadiyyatının keçdiyi tarixi deqradasiya yolunu ortaya qoyan geniş analitik hesabat dərc edib. Hesabatın ən çarpıcı nəticəsi budur: Böyük Britaniya iqtisadiyyatı Avropa İttifaqında (Aİ) qaldığı halda əldə edə biləcəyi potensial səviyyədən hazırda təxminən 6% geri qalır.
Bu rəqəm bankın iki il əvvəl hesabladığı 5%-lik proqnozla müqayisədə itkilərin daha da dərinləşdiyini göstərir.
Goldman Sachs Böyük Britaniyanın real iqtisadi itkilərini ölçmək üçün mürəkkəb statistik modeldən istifadə edib. Böyük Britaniya ilə eyni iqtisadi struktura, ticarət həcminə və inkişaf tempinə malik digər inkişaf etmiş ölkələrin göstəriciləri əsasında "sintetik (virtual) Böyük Britaniya" modeli yaradılır. Real iqtisadiyyat bu virtual "əkiz" ilə müqayisə olunur.
Bütün bu neqativ fonlara baxmayaraq, Goldman Sachs ən pis mərhələnin geridə qaldığını və ticarətdə sabitləşmə meyllərinin başladığını qeyd edir. Ölkədə ictimai rəy də tamamilə dəyişib. Hazırda britaniyalıların 52%-i yenidən Avropa İttifaqına inteqrasiyanı dəstəkləyir.
Goldman Sachs-ın bu hesabatı, iqtisadi inteqrasiyadan qlobal proteksionizmə və izolyasiyaya keçidin bir dövlət üçün hansı qiymətə başa gəldiyini göstərən ən böyük empirik nümunədir. 6%-lik ÜDM itkisi sadəcə mücərrəd rəqəm deyil; bu, milyardlarla funt-sterlinq itirilmiş vergi gəlirləri, daxili infrastruktur layihələrinin maliyyələşməsinin azalması və Britaniya vətəndaşlarının alıcılıq qabiliyyətinin zəifləməsi deməkdir.
Lakin London hökumətinin qarşısında iqtisadi artımı yenidən 1.7%-ə çatdırmaq üçün mühüm fürsət var: Brüssel ilə gömrük və ticarət maneələrini mərhələli şəkildə yumşaltmaq. Cari siyasi konyuktura və xalqın rəyi də artıq bu praqmatik yaxınlaşmanı diktə edir.
MONETAR.AZ
