Dünən Yaxın Şərqdə üç ölkə ABŞ, İsrail və İran arasında elan olunmuş atəşkəs fonunda hava məkanının açılmasına və aviareyslərin tədricən bərpasına başladıqlarını açıqlayıb.
İraqda Mülki Aviasiya İdarəsi vəziyyətin sabitləşməsindən sonra “ölkənin hava məkanının və bütün hava limanlarının fəaliyyətinin dərhal bərpasını” elan edib.
Bəhreyn isə milli hava limanının rəsmi saytında uçuşların mərhələli şəkildə bərpa olunduğunu bildirib.
İsrail də ölkənin hava məkanında uçuşların yenidən başladığını və Ben-Qurion hava limanının 9 aprel gecə yarısından etibarən açıldığını açıqlayıb. Ölkədə hərbi vəziyyətlə bağlı tətbiq edilən bütün məhdudiyyətlər də aradan qaldırılıb və yaxın vaxtlarda digər hava limanlarının da fəaliyyəti bərpa olunacaq.
Bundan əlavə, daha əvvəl Birləşmiş Ərəb Əmirlikləri də uçuşların tədricən normal rejimə qaytarılacağını bəyan etmişdi.
8 aprel səhər saatlarında ABŞ və İran iki həftəlik atəşkəs elan ediblər. İsraildən başqa digər ölkələrdə uçuşların bərpası ilə bağlı hazırlıqlar hələlik şərti xarakter daşıyır: müşahidə və bron üçün açıq uçuşlar hələ mövcud deyil.
Bu arada, atəşkəsin ilk günündə İran ABŞ və İsraili Lavan adasındakı neft emalı zavodlarına davam edən zərbələrlə razılaşmanı pozmaqda ittiham edib. İran həmçinin 8 aprel səhər saatlarında Küveytə pilotsuz uçuş aparatları ilə zərbələr endirib. İsrail isə Livanda əməliyyatlarını davam etdirir.
