Asiya-Sakit okean regionunda mayeləşdirilmiş təbii qazın (LNG) idxalı son altı ilə yaxın dövrün minimum səviyyəsinə enib. Yaxın Şərqdə hərbi münaqişənin kəskinləşməsi qlobal təchizat zəncirlərini iflic edib və bu da dünyanın ən böyük qaz alıcılarını istehlakı sərt şəkildə azaltmağa və kömür elektrik stansiyalarını yenidən işə salmağa məcbur edir. Bu barədə Bloomberg məlumat yayıb.
Həftəsonu regiona LNG tədarükünün 30 günlük hərəkətli orta göstəricisi psixoloji hədd olan 600 min tondan aşağı düşüb. Bu, 2020-ci ilin iyunundan — COVID-19 pandemiyası səbəbindən qlobal iqtisadiyyatın və qaz tələbatının iflic olduğu dövrdən bəri ən aşağı səviyyədir.
Asiya ölkələri uzunmüddətli qaz çatışmazlığına hazırlaşır. ABŞ və İran arasında sülh danışıqlarının uğursuz nəticələnməsi böhranın tezliklə həll olunacağına dair ümidləri demək olar ki, aradan qaldırıb.
Tədarükün azalması region ölkələrinə fərqli təsir etsə də, ümumi tendensiya eynidir. Pakistan kimi ölkələr xüsusilə həssasdır. Ölkə mart ayının əvvəlindən bəri Qətərdən bir dənə də LNG tankeri qəbul etməyib. Hindistanda idxal illik müqayisədə 20%, Çində isə 30% azalıb.
Eyni zamanda, texnoloji baxımdan inkişaf etmiş Yaponiya və Cənubi Koreya kimi əsas alıcılarda da tədarük son altı ilin mövsümi minimumuna enib.
Region ölkələri LNG qiymətlərində yeni kəskin artım dalğasına hazırlaşır. Artıq bugün Asiya sessiyasında neft və Avropa qaz fyuçerslərində ciddi bahalaşma qeydə alınıb.
Kəskin qaz çatışmazlığı şəraitində hökumətlər təcili və bəzən ekoloji baxımdan ziddiyyətli addımlar atır. Məsələn, Yaponiyada bəzi qaz elektrik stansiyaları istehsalı məcburi şəkildə azaldır, Cənubi Koreya isə kömür stansiyalarının fəaliyyəti ilə bağlı bütün ekoloji məhdudiyyətləri rəsmi şəkildə ləğv edib.
