Bugün Avropa fond bazarlarında kəskin artım qeydə alınıb. ABŞ ilə İran arasında şərti atəşkəs razılaşmasının əldə olunması Yaxın Şərqdə həftələrlə davam edən gərginliyi azaltdığı üçün artım demək olar ki, bütün sektorları əhatə edib.
Alman avtomobil istehsalçıları ən böyük qazananlar sırasında olub: Porsche SE, Mercedes-Benz, Porsche AG, Volkswagen və BMW səhmləri 4–7% artıb.
Lüks mallar istehsalçıları da əhəmiyyətli bahalaşma göstərib: Kering, LVMH və Hermès səhmləri təxminən 6–7% yüksəlib.
Razılaşma ABŞ prezidenti Donald Trump-ın İranla iki həftəlik hücumların dayandırılmasına razılıq verdiyini bildirməsindən sonra əldə olunub. Şərtlərə Hörmüz boğazının dərhal açılması və Tehranın 10 maddəlik təklifində irəliləyiş daxildir.
İranın xarici işlər naziri Abbas Araqchi isə ölkənin Milli Təhlükəsizlik Şurası adından silahlı qüvvələrin “müdafiə əməliyyatlarını dayandıracağını” açıqlayıb.
Bank sektoru da genişmiqyaslı artım göstərib. Commerzbank səhmləri təxminən 10%, Deutsche Bank isə 7,3% yüksəlib. İspaniyanın BBVA, CaixaBank, Sabadell, Bankinter, Santander və Unicaja səhmləri 3,5–8% artıb.
Fransanın BNP Paribas, Société Générale və Crédit Agricole səhmləri 5–10% bahalaşıb, İtaliyanın bank indeksi FTSE Italia All-Share Banks isə 6,5% yüksəlib.
Avropa yarımkeçirici istehsalçıları da güclü artım nümayiş etdirib: BE Semiconductor Industries, ams-OSRAM, ASML, Soitec və STMicroelectronics səhmləri 5–11% artıb.
Buna qarşılıq, enerji şirkətlərinin səhmləri ucuzlaşıb, çünki atəşkəs xəbərlərindən sonra neft qiymətləri 100 dollar həddindən aşağı düşüb. Brent crude oil fyuçersləri təxminən 14% azalaraq 94,30 dollara, WTI crude oil isə 15%-dən çox ucuzlaşaraq 95,77 dollara enib.
MONETAR.AZ
