Səudiyyə Ərəbistanı strateji əhəmiyyətli “Şərq–Qərb” neft boru kəmərinin sutkada 7 milyon barrel ötürmə gücünü tam şəkildə bərpa edib. Bu addım ölkənin qeyri-sabit Hörmüz boğazıdan yan keçərək enerji ixracını təmin etmək strategiyasının bir hissəsidir.
Səudiyyə Ərəbistanı Energetika Nazirliyi bazar günü bildirib ki, ötən həftə hücum nəticəsində zədələnmiş nasos stansiyasının təmiri tamamlanıb və gündə 700 min barrel ötürmə qabiliyyəti yenidən istifadəyə verilib.
746 mil (təxminən 1200 km) uzunluğundakı boru kəmərinin bərpası Səudiyyə neftinin Qırmızı dəniz terminalına axınını gücləndirir. Son aylarda bu marşrut üzrə ixrac həcmi Yaxın Şərqdə dəniz nəqliyyatındakı risklər səbəbilə kəskin artıb.
Bununla yanaşı, Saudi Aramco Manifa dəniz yatağında da hasilatı bərpa edib. Bu yataq əvvəlki mərhələdə gündə 300 min barrel istehsal itirmişdi.
Nazirlik açıqlamasında bildirib ki, bu sürətli bərpa krallığın enerji sisteminin yüksək operativ dayanıqlığını və böhran idarəetmə qabiliyyətini göstərir.
Eyni zamanda, əsas ixrac mənbələrindən biri olan Xurays yatağında təmir işləri davam edir və burada da gündə 300 min barrel həcmində itki hələ tam bərpa olunmayıb.
Ümumilikdə, infrastrukturun sabitləşməsi qlobal neft bazarına müsbət təsir göstərir. Lakin Qırmızı dəniz marşrutunda təhlükəsizlik riskləri və davam edən təmir işləri səbəbindən neft qiymətlərində “müharibə riski premiumu” hələ də qalır və Brent və WTI fyuçerslərinə təsir edir.
Bunun fonunda İran tərəfi də daxili enerji infrastrukturunun 70–80% bərpasının yaxın 1–2 ayda mümkün olacağını bildirib. Bu isə regionda tam normallaşmanın hələ vaxt tələb etdiyini göstərir.
