Land Rover Range Rover modelinin SV Ultra adlı yeni modifikasiyasını təqdim edib. Bu versiya model sırasının ən dəbdəbəli və texnoloji cəhətdən ən inkişaf etmiş variantı kimi mövqeləndirilir.
Yeni versiyanın əsas yeniliyi ultra nazik elektrostatik səs emitentlərinə malik audio sistemidir. Bu, indiyədək Range Rover modellərində istifadə olunan ən qabaqcıl səs sistemidir. Avtomobilin başlıqlarında, oturacaq arxalarında, tavanda və digər hissələrində qalınlığı cəmi 1 mm olan 21 belə qurğu yerləşdirilib. Bildirilir ki, onlar ənənəvi audio sistemlərlə müqayisədə 90% daha az enerji sərf edir və eyni dərəcədə yüngüldür.
Sistem beş sabvufer, həmçinin Body and Soul Seat (BASS) texnologiyası və Sensory Floor funksiyası ilə tamamlanır. Oturacaqlarda və döşəmə altında yerləşən xüsusi elementlər süni intellekt vasitəsilə musiqiyə uyğun vibrasiyalar yaradır. Bu sistem həmçinin musiqisiz rejimdə də rahatlaşdırıcı və ya canlandırıcı effekt verə bilir.
Xarici görünüşdə SV Ultra eksklüziv Titan Silver rəngi ilə seçilir. Bu rəng alüminium hissəcikləri sayəsində “maye metal” effekti yaradır. Ön hissədə xrom detallar, radiator barmaqlığında və digər elementlərdə Satin Platinum Atlas rəngli aksentlər istifadə olunub. Avtomobil 23 düymlük iki rəngli yüngül lehimli disklərlə təchiz edilib.
Salonunda ənənəvi dəri əvəzinə Ultrafabrics materialından istifadə olunub (Orchid White və Cinder Grey rənglərində). Oturacaqlar lazerlə işlənmiş mozaika naxışları ilə bəzədilib, interyerdə isə palma ratanından hazırlanmış dekorativ elementlər tətbiq edilib.
Texniki baxımdan model dəyişməz qalıb. SV Ultra iki versiyada təqdim olunur:
- P550e — 550 at gücünə malik plug-in hibrid
- P615 — 615 at gücünə malik 4,4 litrlik V8 mühərrikli variant
Modelin Böyük Britaniyada qiyməti açıqlanmayıb və yalnız xüsusi dəvətlə satılır. Avstraliyada isə qiyməti artıq məlumdur — 482,4 min dollar (təxminən 337 min ABŞ dolları). Bu da onu Range Rover tarixində ən bahalı modellərdən birinə çevirir.
MONETAR.AZ
