Microsoft şirkəti Windows 11 əməliyyat sisteminin quraşdırılmasını sadələşdirmək imkanını nəzərdən keçirir. Əgər planlar həyata keçərsə, gələcəkdə istifadəçilərə Microsoft hesabına daxil olmadan lokal hesab yaratmağa icazə verilə bilər.
Hazırda isə Windows 11-in ilkin qurulması zamanı internetə qoşulmaq və Microsoft hesabı ilə daxil olmaq tələb olunur (baxmayaraq ki, bəzi qeyri-rəsmi yollarla bunu keçmək mümkündür).
Dəyişiklik ideyasını şirkətin uzun illərdir çalışan rəhbərlərindən biri olan Scott Hanselman irəli sürür. O, 20 ildən artıqdır ki, Microsoft-da çalışır və özü də məcburi avtorizasiyanı tənqid edib.
Məlumatlara görə, şirkət paralel olaraq əməliyyat sisteminin interfeysini təkmilləşdirmək, performansı artırmaq və bəzi istifadəçilər üçün narahatlıq yaradan funksiyaları (məsələn, daxili köməkçi) azaltmaq üzərində işləyir. Bundan əlavə, sistemin zəif kompüterlər üçün optimallaşdırılması da planlaşdırılır.
MONETAR.AZ
