2025-ci ilin yanvar–dekabr aylarında Statistanın Consumer Insights platforması tərəfindən aparılan sorğu dünyada böyüklər arasında ən çox rast gəlinən sağlamlıq simptomlarını müəyyən edib. Araşdırma 18–64 yaş arası şəxslər arasında keçirilib və onların son 12 ay ərzində yaşadıqları sağlamlıq problemlərini əhatə edib.
Araşdırmanın nəticələrinə görə, bel ağrısı, baş ağrısı və oynaq ağrıları kimi ağrı simptomları demək olar ki, bütün ölkələrdə ən çox rast gəlinən sağlamlıq problemləridir. Bu göstərici xüsusilə Almaniyada (59 faiz) və Birləşmiş Krallıqda (56 faiz) yüksək olub. Meksika, Hindistan və ABŞ-da isə böyüklərin təxminən yarısı belə problemlərlə üzləşdiyini bildirib. Mütəxəssislər bunu əsasən əhalinin yaşlanması, oturaq həyat tərzi və iş şəraiti ilə bağlı risklərlə əlaqələndirirlər.
Tənəffüs yolları ilə bağlı simptomlar – öskürək, burun axması və boğaz ağrısı – əksər ölkələrdə ikinci ən geniş yayılmış sağlamlıq problemi hesab olunur. Bu simptomlar Çində 45 faizlə ilk sırada yer alıb. Hindistan və Meksikada isə göstərici 50 faiz olmaqla ən yüksək səviyyədə qeydə alınıb. Bu vəziyyətə əsas səbəb kimi hava çirkliliyi və mövsümi xəstəliklərin təsiri göstərilir.
Psixi sağlamlıq problemləri, yuxu pozuntuları və həzm sistemi ilə bağlı narahatlıqlar da geniş yayılıb, lakin onların səviyyəsi ölkələr üzrə fərqlənir. Depressiya, narahatlıq və emosional tükənmə kimi psixi sağlamlıq problemləri Birləşmiş Krallıqda 37 faiz, ABŞ-da isə 41 faiz təşkil edib. Meksika, Hindistan və Almaniyada isə bu göstərici 22–32 faiz arasında dəyişir.
Yuxu pozuntuları bütün ölkələrdə ən çox rast gəlinən simptomlar arasında üçüncü və ya dördüncü yerdə qərarlaşıb. Birləşmiş Krallıq, Meksika, ABŞ və Almaniyada respondentlərin 36–42 faizi bu problemlə qarşılaşdığını bildirib. Çin və Hindistanda isə göstərici daha aşağıdır – müvafiq olaraq 24 və 27 faiz.
Həzm sistemi problemləri xüsusilə Meksikada (57 faiz) və Hindistanda (34 faiz) geniş yayılıb və bu ölkələrdə üçüncü ən çox rast gəlinən simptom hesab olunur. Birləşmiş Krallıq və Almaniyada isə bu göstərici 33 faiz təşkil edərək dördüncü yerdə qərarlaşıb.
Mütəxəssislərin fikrincə, qidalanma vərdişləri, həyat tərzi və yerli şərait sağlamlıq problemlərinin yayılmasına təsir edən əsas amillərdəndir. Bununla yanaşı, müxtəlif ölkələrdə insanların simptomları bildirmə üsulu və mədəni faktorlar da nəticələrə təsir göstərə bilər.
MONETAR.AZ
