Cənubi Koreyanın texnologiya nəhəngi Samsung Electronics, şirkət tarixinin ən böyük işçi etirazlarından biri ilə üz-üzədir. Bonus ödənişləri ilə bağlı rəhbərliklə razılığa gələ bilməyən təxminən 50 min əməkdaş gələn həftədən etibarən işi dayandırmağı planlaşdırır. Reuters-in məlumatına görə, tərəflər arasında hökumətin vasitəçiliyi ilə aparılan danışıqlar nəticəsiz qalıb.
Həmkarlar ittifaqı rəhbərliyin danışıqları bərpa etmək təklifinə sərt şərtlərlə cavab verib. 18 günlük etiraz aksiyasının 21 may tarixində başlaması planlaşdırılır. İttifaq yeni müzakirələrə yalnız iyunun 7-dən sonra və şirkətin yaxın 24 saat ərzində daha cəlbedici təklif irəli sürəcəyi təqdirdə razıdır.
Samsung rəhbərliyinin məsələni yerində həll etmək üçün Pyeongtaek şəhərinə (şirkətin ən iri çip zavodlarından birinin yerləşdiyi yer) yollandığı bildirilir. Etirazın kökündə dayanan əsas amil süni intellekt (Sİ) bumundan əldə olunan gəlirlərin bölüşdürülməsidir.
İşçilər bildirirlər ki, onların aldıqları mükafatlar əsas rəqibləri olan SK Hynix əməkdaşlarının bonuslarından xeyli geri qalır. Xüsusilə Sİ sektorunda istifadə olunan yüksək ötürücülü yaddaş (HBM) çiplərindən əldə edilən böyük qazancın ədalətli bölünməməsi narazılığı pik həddə çatdırıb.
Tətil xəbəri həm şirkət, həm də qlobal bazarlar üçün ciddi narahatlıq yaradıb. Xəbərdən dərhal sonra Samsung Electronics səhmləri 9,3% dəyər itirib. Həmkarlar ittifaqının hesablamalarına görə, 18 günlük dayanma şirkətə təxminən 20 milyard dollar (30 trilyon von) zərər vura bilər. Analitiklər xəbərdarlıq edirlər ki, Samsung zavodlarının dayanması qlobal çip tədarükündə kəskin qıtlığa və texnoloji cihazların qiymətinin artmasına səbəb olacaq.
Cənubi Koreya rəsmiləri, o cümlədən Kim Conq Kvan, bu hadisənin ölkə ixracatı üçün "bərpası mümkün olmayan" fəsadlar törədə biləcəyindən narahatlıqlarını ifadə ediblər. Hazırda bütün diqqətlər şirkətin yaxın 24 saat ərzində verəcəyi yeni təklifə yönəlib.
MONETAR.AZ
