Citigroup bankının qiymətləndirməsinə görə, Hörmüz boğazında hərəkət daha bir ay pozularsa, neftin qiyməti bir barel üçün 110 dollara qədər yüksələ bilər. Bu barədə Bloomberg yazır.
Şirkətin hesablamalarına əsasən, ABŞ–İran müharibəsi səbəbindən xam neft və neft məhsulları üzrə qlobal ehtiyat itkiləri boğaz daha dörd həftə bağlı qalsa, təxminən 1,3 milyard barelə çata bilər.
Hətta bu həftə atəşkəs uzadılsa və may ayı ərzində gəmiçilik və hasilat tədricən bərpa olunsa belə, ümumi qlobal ehtiyatların təxminən 900 milyon barel azalacağı gözlənilir. Bu rəqəmə artıq bazarın itirdiyi 500 milyon barel və hasilatın bərpasındakı gecikmələr və münaqişənin vurduğu ziyan səbəbilə gözlənilən əlavə 400 milyon barel daxildir.
Citi-nin proqnozuna görə, Hörmüz boğazında fasilələr daha iki ay davam edərsə, bazardan təxminən 1,7 milyard barel neft çıxarıla bilər və qiymətlər 130 dollar səviyyəsinə qədər yüksələ bilər.
Hətta münaqişə bu həftə başa çatsa belə, bank hesab edir ki, iyunun sonuna qədər qlobal neft və yanacaq ehtiyatları son 8 ilin ən aşağı səviyyəsinə enəcək. Bu ehtiyatların bərpası isə, münaqişədən sonra bazarda gündəlik 1 milyon barel profisitin tez bərpası şərti ilə belə, iki ildən çox vaxt ala bilər.
Bank proqnozlaşdırır ki, bu həftə İran və ABŞ arasında ilkin razılaşma imzalana və ya atəşkəs uzadıla bilər ki, bu da daha geniş sazişə çevrilə bilər.
“Bununla belə, danışıqlar dalana dirənərsə, biz daha uzunmüddətli fasilələr ssenarisinə keçməyə hazırıq”, deyə Max Layton rəhbərliyi ilə Citigroup analitikləri qeyd ediblər.
Dünən Nyu-Yorkda Brent neftinin qiyməti 5% artaraq təxminən 95 dollar səviyyəsində ticarət olunub. Bu artım Donald Trampın atəşkəsin uzadılmasının “çox aşağı ehtimallı” olması barədə bəyanatından sonra qeydə alınıb. ABŞ prezidenti vurğulayıb ki, yekun razılaşma əldə olunana qədər boğaz bağlı qalacaq.
MONETAR.AZ
