Bloombergin məlumatına görə, bugün səhər saatlarında iki quru yük gəmisi və bir yanacaq tankeri olmaqla üç gəmi davam edən ABŞ–İran blokadası şəraitində Hörmüz boğazını keçməyə cəhd edib.
İran bayrağı altında üzən “Shoja 2” yük gəmisi boğazı keçərək Oman körfəzinə çıxıb, lakin hazırda yerləşmə siqnallarını ötürməyi dayandırıb. ABŞ Hərbi Dəniz Qüvvələrinin bazar günü başqa bir İran gəmisini ələ keçirməsindən sonra bu gəminin hərəkəti xüsusi diqqətlə izlənilir. Bu hadisə Vaşinqtonun ötən həftə su yolunu blokadaya almasından sonra ilk belə hal idi.
Digər iki gəminin İranla birbaşa əlaqəsi görünmür. Qambiya bayrağı altında üzən “Lian Star” yük gəmisi də boğazı keçərək hazırda Oman körfəzinə doğru cənuba istiqamət alır. Orta məsafəli “Ean Spir” tankeri isə BƏƏ-nin Ras al-Xaimah sahilləri yaxınlığından şimal-şərq istiqamətində hərəkətə başlayıb və hazırda Larak Island cənubunda yerləşir, təyinat nöqtəsi kimi Shinas göstərilir.
Ümumilikdə isə, İranın əvvəlcə dəhlizi açıq elan edib daha sonra ABŞ-ın blokadanı ləğv etməkdən imtina etməsindən sonra yenidən bağlaması fonunda bu həyati əhəmiyyətli su yolunda hərəkət demək olar ki, dayanıb. Hazırda təxminən 800 gəmi Fars körfəzində blokadada qalır.
Donald Tramp dünən bildirib ki, ABŞ blokadası hələlik qüvvədə qalacaq. O, həmçinin çərşənbə axşamı axşamı başa çatan iki həftəlik atəşkəsin uzadılmasının az ehtimal olunduğunu qeyd edib. ABŞ və İran arasında danışıqların Pakistanda keçirilməsi gözlənilir.
MONETAR.AZ
