Qlobal fərdi kompüter, noutbuk və server istehsalçıları yaxın aylarda məhsullarının qiymətlərini növbəti dəfə qaldırmağa hazırlaşırlar. TrendForce analitik şirkətinin hesabatına istinadən, qiymət artımına əsas səbəb mikroçiplərdə və operativ yaddaşlarda (RAM) istifadə olunan komponentlərin qlobal miqyasda kəskin bahalaşmasıdır. Dünyanın rəqəmsal nəhəngləri artıq qiymət artımının qrafikini və strategiyasını müəyyən ediblər.
Kompüter istehsalçılarının bu addımı Azərbaycandakı pərakəndə və topdansatış bazarına da birbaşa təsir göstərəcək. Ölkəmizə idxal olunan rəqəmsal texnikanın (xüsusilə korporativ və təhsil yönümlü noutbukların) qiymətlərində payız mövsümünə doğru artım müşahidə oluna bilər. Şəxsi və ya biznes məqsədləri üçün noutbuk və server almağı planlaşdıran şəxslərin daxili bazardakı mövcud anbar qalıqlarından yararlanması iqtisadi cəhətdən daha səmərəlidir.
Çip sənayesindəki bu böhran göstərir ki, rəqəmsal cihazlar qlobal xammal və yarımkeçirici bazarından birbaşa asılıdır və komponent səviyyəsindəki istənilən qiymət artımı bir neçə ay ərzində son istehlakçının cibinə əks olunur.
MONETAR.AZ
