Çində Bahar Bayramı (Spring Festival) dövründə məhsul çeşidi ciddi dəyişikliklərdən keçir. İstehlakçılar bayram alış-verişində getdikcə daha çox sağlamlıq, innovasiya və fərdiləşməyə önəm verirlər.
Ənənəvi olaraq rifah və uğuru simvolizə edən qırmızı rəngli məhsulların üstünlük təşkil etdiyi bu dövrdə, bu il təkliflər daha gənc və canlı dizaynlara doğru şaxələnib. Bu dəyişiklik gənc, trendləri izləyən istehlakçıların zövqlərinin formalaşdığını göstərir.
Məsələn, Guangdong əyalətinin Şençjen şəhərindəki Walmart mağazasında rəflər rəngarəng tonlar və diqqətçəkən, oynaq dizaynlarla bəzədilib ki, bu da kiçik ailələrə və gənc alıcılara yönəlib.
Yeni estetik yanaşma ilə yanaşı, məşhur brend əməkdaşlıqları və viral mədəni elementlər də tələbi artırmaq məqsədilə məhdud saylı hədiyyə dəstlərinə daxil edilib.
Hazırda Walmart rəflərində Zootopia 2 IP lisenziyalı məhsullar, aparıcı şirniyyat istehsalçısı Hsu Fu Chi ilə birgə hazırlanmış geri sayım təqvimi şokoladları və “kor qutu” konfet dəstləri, keşniş dadlı yoqurt və “yaxşı başlanğıc” rəmzi olan “Mahjong daşları” formasında peçenyelər yer alır.
Walmart China-nın baş vitse-prezidenti Zhu Jun bildirib ki, Bahar Bayramı qeyd etmə formaları getdikcə daha da müxtəlifləşir.
“İstər ailə görüşləri, istər səyahət, istərsə də özünə vaxt ayıraraq dincəlmə – bunların hamısı bugünkü istehlakçıların daha yaxşı həyat axtarışını əks etdirir,” – deyə o qeyd edib.
CTR Market Research şirkətinin baş meneceri Jason Yu isə bildirib ki, müasir istehlakçılar fərdiliyə, emosional bağlılığa və dizaynın cəlbediciliyinə daha çox dəyər verirlər. “Canlı rənglər, müasir dizaynlar və yeni intellektual mülkiyyətlər kimi populyar trendləri məhsullara daxil etməklə brendlər Bahar Bayramına xas ənənəvi məhsulların eyniliyindən uzaqlaşa və gənc istehlakçılara xitab edən təkliflər yarada bilərlər,” – deyə o vurğulayıb.
Bu dəyişiklik təkcə estetik xarakter daşımır, həm də xüsusilə sürətlə böyüyən özəl marka (private label) sektorunda innovasiya üçün yeni imkanlar açır.
Özəl markalı məhsullar artıq Çində sürətli dövriyyəli istehlak malları (FMCG) bazarının mərkəzi hissəsinə çevrilib. Worldpanel və Bain & Company tərəfindən birgə dərc olunan “14-cü Çin Alıcı Hesabatı 2025”ə əsasən, 2025-ci ilin üçüncü rübündə özəl markalar FMCG satışlarının 2 faizini təşkil edib ki, bu da son iki ildə 44 faiz artım deməkdir.
Pərakəndə satıcılar bu tələbi tez bir zamanda dəyərləndirərək, alıcı davranışı barədə məlumatlardan və inteqrasiya olunmuş tədarük zəncirlərindən istifadə etməklə özəl marka portfellərini genişləndirirlər. Walmart və Wumart kimi pərakəndəçilər artıq sadəcə istehlakçı trendlərini izləmirlər, həm də bu yeni üstünlüklərə uyğun eksklüziv məhsullar hazırlayaraq onları qabaqlayırlar.
Məsələn, Walmart China bu tendensiyanı “Marketside” adlı özəl marka xətti ilə fəal şəkildə tətbiq edir. Bu xətt təzə inqrediyentlərə, sağlam qidalanmaya və sadə tərkiblərə fokuslanır. Zhu Jun-un sözlərinə görə, şirkət bu özəl marka altında artıq təxminən 1 000 məhsul mövqeyi (SKU) hazırlayıb və bu seqment hələ ilkin mərhələdə olsa da, artıq Walmart-ın ümumi strategiyasının əsas hissəsinə çevrilib.
Zhu bildirib ki, şirkət format dəyişikliyinin bir hissəsi kimi özəl marka təkliflərini genişləndirir və bununla istehlakçıların dəyişən ehtiyac və üstünlüklərinə cavab verməyi hədəfləyir. O əlavə edib ki, aparıcı brendlərlə tərəfdaşlıqlara üstünlük vermək və təchizatçılarla birgə məhsullar yaratmaq Walmart-ın uzunmüddətli inkişaf strategiyasının əsasını təşkil edir.
Bu tendensiya pərakəndə ticarət sektorunda daha geniş bir dəyişikliyin tərkib hissəsidir.
Jason Yu-nun sözlərinə görə, özəl markaların yüksəlişi təkcə bir pərakəndəçiyə xas deyil, bütövlükdə bazarda baş verən struktur dəyişikliyinin göstəricisidir. Xüsusilə kiçik pərakəndəçilər qiymət təzyiqlərini aradan qaldırmaq və iri, köklü brendlərlə rəqabət aparmaq üçün özəl markalardan istifadə edirlər.
Çinin istehsal sektoru yetkinləşdikcə, elektron ticarət platformaları kiçik istehsalçılara daha aşağı xərclə keyfiyyətli məhsullar təqdim etməyə imkan yaradır. İstehlakçılar isə getdikcə “daha münasib qiymətə müqayisə oluna bilən keyfiyyət” və eyni zamanda rahatlıq və yenilik təklif edən təcrübələr axtarırlar.
Bayram mövsümündə rahatlıq təmin edən pərakəndə formatlara və məhsullara tələbat da artır.
Walmart şəhər ailələrinin sürətli həyat tərzinə uyğunlaşdırılmış icma mağazalarını genişləndirir. 2025-ci ilin dekabrında Şençjendə dörd yeni mağazanın açılması ilə şirkət “kiçik, səliqəli və yaxın” konsepsiyalı mağaza modelini miqyaslandırmağa davam edir. Bu mağazalar təzə məhsullara, çörək məmulatlarına, hazır yeməklərə və qəlyanaltılara fokuslanır və əsas vurğu dəyər və keyfiyyətə edilir.
Walmart-ın icma mağazaları rahatlıq və dəyərin artan əhəmiyyətini göstərir. Şirkətin məlumatına görə, müxtəlif kateqoriyalar üzrə təxminən 2 000 SKU təqdim edən bu mağazalar müştərilərdən müsbət rəy alıb; artan ziyarətçi axını və təkrar alışlar “10 dəqiqəlik piyada yaşayış dairəsi” konsepsiyasının cəlbediciliyini təsdiqləyir.
Şirkətin son maliyyə nəticələri supermarket formatının optimallaşdırılmasının vacibliyini bir daha önə çıxarır.
Üçüncü rübdə Walmart-ın xalis satışları illik müqayisədə 21,8 faiz artaraq 6,1 milyard dollara çatıb. Müqayisə edilə bilən satışlar isə əsasən üzvlük mağazalarının (Sam’s Club) böyüməsi və güclü elektron ticarət performansı hesabına 13,8 faiz artıb.
Bu arada, pərakəndə bazarın daha geniş mənzərəsində yeni kanallar üzrə sürətli artım müşahidə olunur.
Kantar-ın məlumatına görə, üzvlük əsaslı pərakəndəçilər, qəlyanaltı şəbəkələri və diskont formatları müvafiq olaraq illik 40 faiz, 51 faiz və 92 faiz artım göstərib. Bu, istehlakçıların keyfiyyətdən imtina etmədən daha münasib qiymət, rahatlıq və təcrübəyə üstünlük verməsi kimi dərin bir tendensiyanı əks etdirir.
“Kanallar artıq passiv satış nöqtələri deyil, aktiv tələbat yaradan platformalara çevrilib. Brendlər pərakəndəçilər və platformalarla əməkdaşlığa yanaşmalarını yenidən düşünməli, hər kanalı innovasiya, əlaqə və dəyər yaratma ekosistemi kimi qəbul etməlidirlər,” – deyə Bain & Company-nin Çin üzrə rəhbəri Derek Deng “China Shopper Report 2025” hesabatında bildirib.
Deng-in sözlərinə görə, bu anlayışları məhsul təkliflərinə və bazara çıxış strategiyalarına uğurla inteqrasiya edə bilən pərakəndəçilər və brendlər Çində FMCG sektorunun növbəti inkişaf mərhələsinə liderlik edəcəklər.
MONETAR.AZ
