Prezident İlham Əliyev Azərbaycan Respublikasının Vergi Məcəlləsi və "Hüquqi şəxslərin dövlət qeydiyyatı və dövlət reyestri haqqında" Qanunda əhəmiyyətli dəyişiklikləri təsdiqləyib. Bu yeni qaydalar şirkətlərin və fərdi sahibkarların iflas proseslərini daha şəffaf və tənzimlənən etməyə xidmət edir.

Bu yeni qanunla iflas prosesinin bütün mərhələlərində məlumatlandırma və qeydiyyat mexanizmləri gücləndirilir. Əgər siz hüquqi şəxs yaratmadan sahibkarlıq fəaliyyəti ilə məşğul olan fiziki şəxssinizsə, müflis elan olunduğunuz və ya iflas prosesinə xitam verildiyi tarixdən sonra 15 gün ərzində vergi orqanına məlumat verməlisiniz. Bu, fərdi sahibkarların iflas vəziyyətinin rəsmi şəkildə tanınmasını sürətləndirəcək.

Ən vacib dəyişikliklərdən biri budur ki, hüquqi şəxsin iflas prosesində olması dövlət qeydiyyatına alınacaq. Bu o deməkdir ki, şirkətin maliyyə vəziyyəti barədə rəsmi məlumatlar dövlət reyestrinə daxil ediləcək ki, bu da həm digər tərəfdaşlar, həm də dövlət orqanları üçün şəffaflığı artıracaq. Bankların iflası isə "Banklar haqqında" Qanunun tələblərinə uyğun qeydə alınacaq.

İflas prosesinin qeydiyyatı üçün müəyyən müddətlər var. Əgər iflas prosesi məhkəməsiz başlayırsa, borclunun iflas prosesinin başlanması barədə qərar qəbul etdiyi tarixdən 15 gün müddətində müvafiq icra hakimiyyəti orqanına müraciət edilməlidir. Yox, əgər iflas prosesi məhkəmə yolu ilə başlayırsa, borclunun ərizəsi məhkəmə tərəfindən qəbul edildiyi və ya kreditorun ərizəsi əsasında borclunun müflis elan olunması barədə məhkəmə qərarı qanuni qüvvəyə mindiyi tarixdən 15 gündən gec olmayaraq müvafiq orqana müraciət edilməlidir. Müraciət edərkən baş verən dəyişiklik göstərilməli, iflas prosesinin başlanması barədə borclunun qərarı və ya məhkəmənin müflis elan etmə qərarı, eləcə də möhür təqdim olunmalıdır.

Əgər şirkətdə başlamış iflas prosesi onun ləğvi ilə nəticələnmirsə, yəni fəaliyyətinə davam edəcəksə, iflas prosesinə xitam verilmə tarixindən 15 gün ərzində müvafiq ərizə, prosesə xitam verilməsi barədə qərar və üzərində “iflas prosesində olan” yazılmış möhür təqdim edilərək bu fakt qeydə alınır. Hüquqi şəxs müflis olması səbəbindən ləğv edilirsə, əmlak inzibatçısı qurumun ləğv edilməsi barədə məhkəmə qərarı qanuni qüvvəyə mindikdən sonra 10 gün müddətində müvafiq sənədləri və üzərində “iflas prosesində olan” yazısı olan möhürü müvafiq icra hakimiyyəti orqanına təqdim etməlidir. Səhmdar cəmiyyətləri üçün isə Azərbaycan Respublikası Mərkəzi Bankının arayışı da tələb olunur.

Bu dəyişikliklər iflas proseslərinin idarə edilməsində daha çox nizam-intizam, məsuliyyət və şəffaflıq gətirəcək. Eyni zamanda, həm borclunun, həm də kreditorların hüquqları daha yaxşı qorunacaq. Bu qanun həm də dövlət reyestrindəki məlumatların daha dəqiq və etibarlı olmasını təmin edərək, sahibkarlıq mühitində etibarı gücləndirməyə kömək edəcək.

MONETAR.AZ