Vodafone Group və Amazon Leo Avropa və Afrikanın ucqar bölgələrində 4G və 5G mobil stansiyalarının qoşulması üçün Amazon-un aşağı Yer orbitində yerləşən genişzolaqlı peyk şəbəkəsindən istifadəni nəzərdə tutan saziş imzalayıblar.
Tərəfdaşlıq Vodafone-a əsas şəbəkə ilə uzun optik lif xətləri və ya sabit simsiz rabitə kanalları çəkmədən, əvvəllər xidmət göstərilməyən ərazilərdə mobil baza stansiyaları yerləşdirməyə imkan verəcək.
Xidmət həmçinin daşqınlar nəticəsində mobil qüllələri birləşdirən optik lif xətlərinin qırılması və ya zədələnməsi zamanı fövqəladə və kritik onlayn xidmətlər üçün şəbəkənin dayanıqlığını artıracaq.
Minlərlə peykdən ibarət bürc üzərində qurulan Amazon Leo, mobil stansiyalar üçün yükləmə sürəti 1 Gbit/s, göndərmə sürəti isə 400 Mbit/s-ə qədər olan yüksək sürətli magistral əlaqə təmin edir. Bu xidmət telekommunikasiya provayderlərinə peyk rabitəsi hesabına şəbəkə infrastrukturunu genişləndirməyə imkan verir.
Razılaşma çərçivəsində Vodafone Almaniyada və digər Avropa ölkələrində mobil baza stansiyalarını öz əsas telekommunikasiya şəbəkələrinə qoşmaq üçün Amazon Leo-dan istifadə edəcək.
Daha sonra xidmət Afrikada Vodacom vasitəsilə tətbiq olunacaq. Şirkətlər ilk mobil stansiyaların 2026-cı ildə qoşulacağını gözləyirlər.
Vodafone Group-un baş icraçı direktoru Margherita Della Valle bildirib ki, şirkət daha çox mobil baza stansiyasını əsas şəbəkəyə qoşmaq və çətin şəraitdə dayanıqlığı gücləndirmək üçün kosmosa üz tutur. Onun sözlərinə görə, Amazon Leo peyk bürcü Vodafone-un bütün müştəriləri etibarlı və yüksək sürətli rabitə ilə təmin etmək ambisiyalarını dəstəkləyir.
Amazon Devices & Services-in baş vitse-prezidenti Panos Panay isə qeyd edib ki, Vodafone və Vodacom ilə tərəfdaşlıq Avropa və Afrikada daha milyonlarla insanın şəbəkəyə qoşulması yolunda mühüm addımdır.
Vodacom Group-un baş direktoru Şamil Cussub vurğulayıb ki, Amazon Leo ilə əməkdaşlıq şirkətə ucqar ərazilərdə mobil rabitəni qurmağa və Afrika üzrə daha çox müştərini əhatə etməyə imkan verir.
Saziş Vodafone-un Avropada 5G xidmətlərini genişləndirmək məqsədini dəstəkləyir və Vodacom Vision 2030 strategiyasına uyğundur. Bu strategiya 2030-cu ilə qədər 260 milyon müştərinin əhatə olunmasını, maliyyə xidmətlərinin genişləndirilməsini və smartfonların yayılma səviyyəsinin 75%-ə çatdırılmasını nəzərdə tutur.
Hazırda Amazon Leo orbitdə 200-dən çox peykə malikdir, yüzlərlə digər peyk isə artıq istehsal olunub və buraxılışa hazırdır. Korporativ müştərilər üçün xidmətin ilkin versiyası 2025-ci ilin noyabrında istifadəyə verilib. Vodafone isə 15 ölkədə şəbəkə idarə edərək 360 milyondan çox mobil və genişzolaqlı abunəçiyə xidmət göstərir.
MONETAR.AZ
