Bakının mərkəzində, Dənizkənarı Milli Parkın (Bulvar) füsunkar mənzərəsi fonunda "Classics & Supercars Festival" avtomobil sərgisinə start verilib. Azərbaycan Avtomobil Federasiyası (AAF) və Nazar Holdings tərəfindən birgə təşkil olunan bu möhtəşəm tədbir, həm yerli sakinlərin, həm də paytaxtımızın qonaqlarının böyük marağına səbəb olub.
Festival, avtomobil sənayesinin keşmişi ilə gələcəyini unikal bir məkanda birləşdirir.
Sərginin konsepti iki tamamilə fərqli, lakin eyni dərəcədə heyranedici avtomobil fəlsəfəsini qarşı-qarşıya qoyur:
-
Retro Era: Sərgidə nümayiş etdirilən və 1986-cı ilə qədər konveyerdən çıxmış klassik nəqliyyat vasitələri öz zərif dizaynı, xrom detalları və dövrün mühəndislik ruhu ilə ziyarətçiləri keçmişə səyahətə çıxarır.
-
Müasir Canavarlar: Azərbaycan Avtomobil Federasiyasının və fərdi kolleksiyaçıların şəxsi xəzinəsindən gətirilən eksklüziv idman avtomobilləri isə aerodinamik xətləri və yüksək sürət göstəriciləri ilə fərqlənir.
Tədbir həm ailəvi istirahət, həm də peşəkar avtomobil həvəskarları üçün ideal bir platformaya çevrilib.
Hər bir eksponatın yanında yerləşdirilmiş xüsusi məlumat lövhələri vasitəsilə avtomobillərin istehsal tarixi, mühərrik xüsusiyyətləri və nadir kolleksiya dəyəri barədə ətraflı məlumat əldə etmək mümkündür. Girişin sərbəst olması səbəbindən həftəsonu Bulvar ərazisində böyük insan axını müşahidə olunur.
