ABŞ Prezidenti Donald Tramp ölkədə məşğulluq göstəricilərinin gözləntiləri üstələməsindən sonra Federal Ehtiyat Sisteminin (FED) faiz dərəcələrini artırmasının düzgün qərar olmayacağını bildirib.
O, NBC telekanalının “Meet the Press” proqramına müsahibəsində qeyd edib ki, hazırda müsbət iqtisadi göstəricilər açıqlananda bazarlar faiz artımı gözləntiləri səbəbindən mənfi reaksiya verir.
“Faiz dərəcələrinin artırılması üçün heç bir səbəb yoxdur. Əksinə, faizləri azaltmalıyıq”, – deyə Tramp vurğulayıb.
ABŞ-da may ayı üzrə açıqlanan məşğulluq hesabatına əsasən, kənd təsərrüfatı istisna olmaqla məşğulluq 172 min nəfər artıb və bu göstərici bazar proqnozlarını üstələyib. Eyni zamanda, əvvəlki iki ayın məlumatları da yuxarı istiqamətdə yenidən nəzərdən keçirilib. İşsizlik səviyyəsi isə 4,3 faiz səviyyəsində sabit qalıb.
Məlumatların açıqlanmasından sonra investorlar ilin sonunadək FED-in əsas faiz dərəcəsini 0,25 faiz bəndi artıracağına dair gözləntilərini gücləndiriblər. Bu isə ABŞ xəzinə istiqrazları bazarında satışların artmasına səbəb olub.
Tramp bildirib ki, 16-17 iyun tarixlərində keçiriləcək Federal Açıq Bazar Komitəsinin (FOMC) ilk iclasına rəhbərlik etməyə hazırlaşan Kevin Warşa böyük hörmət bəsləyir. Bununla belə, onun fikrincə, iqtisadiyyat yaxşı nəticələr göstərdiyi halda ölkə faiz artımı ilə “cəzalandırılmamalıdır”.
“Ölkənin borcları və həll edilməli olan digər məsələləri var. Mən müdafiə sahəsinə daha çox investisiya yatırmaq istəyirəm”, – deyə ABŞ Prezidenti əlavə edib.
MONETAR.AZ
