Dubayın simvollarından biri olan Jumeirah Burj Al Arab genişmiqyaslı bərpa işləri səbəbindən 18 ay müddətinə fəaliyyətini dayandıracaq.
1999-cu ildə açılan və yelkəni xatırladan unikal silueti ilə tanınan bu otelin memarlıq irsi qorunacaq. Yenidənqurma işlərinə fransız interyer dizayneri Tristan Auer rəhbərlik edəcək. O, tarixi obyektlərə həssas yanaşması ilə tanınır və portfelinə Parisdəki Hôtel de Crillon və Les Bains Douches kompleksinin yenidən qurulması daxildir.
Jumeirah nümayəndəsi bildirib ki, qarşıdakı dəyişikliklər otelin tarixində yeni mərhələ olacaq. Məqsəd – mərmər, qızıl örtük və Swarovski kristalları ilə bəzədilmiş interyerləri yeniləməklə yanaşı, binanın unikal xarakterini qorumaqdır.
Jumeirah Burj Al Arab ümumilikdə 198 lüks nömrəyə malikdir. Otel dəfələrlə yüksək xidmət səviyyəsinə görə mükafatlar qazanıb və Travel + Leisure tərəfindən Yaxın Şərqin ən yaxşı şəhər oteli seçilib.
MONETAR.AZ
