Azərbaycanda Biləcəri–Yalama dəmir yolu xəttində enerji təchizatı, siqnalizasiya və rabitə sistemlərinin modernləşdirilməsi üzrə layihələndirmə və tikinti-quraşdırma işlərinə start verilir.
“Azərbaycan Dəmir Yolları” QSC (ADY) bu layihənin icrası çərçivəsində hazırlıq mərhələsinə başlayıb.
Azərbaycan hökuməti dəmir yolu xəttinin həyati təminat sistemlərinin yenidən qurulması layihəsi üçün maliyyə dəstəyi məqsədilə Asiya İnkişaf Bankına (AİB) müraciət edib. Ayrılacaq vəsaitin bir hissəsi mövcud müqavilə üzrə işlərin maliyyələşdirilməsinə yönəldiləcək. Layihə üzrə təkliflərin qəbulu mayın 29-dək davam edəcək.
Bu təşəbbüs Biləcəri–Yalama və Bakı–Böyük Kəsik dəmir yolu sahələrində enerji təchizatı, siqnalizasiya və rabitə sistemlərinin modernizasiyasını əhatə edən daha geniş proqramın tərkib hissəsidir.
Proqramın birinci mərhələsi uzunluğu təxminən 192 km olan Biləcəri–Yalama sahəsini əhatə edir (iki xətli dəmir yolu, 15 stansiya). Bu xətt beynəlxalq “Şimal–Cənub” nəqliyyat dəhlizində strateji əhəmiyyətə malikdir. Layihələndirmə daxil olmaqla bütün işlərin 42 ay ərzində başa çatdırılması planlaşdırılır.
İşlər çərçivəsində ən azı 50 km magistral xətt üzrə kontakt şəbəkəsinin və siqnalizasiya sistemlərinin quraşdırılması, həmçinin ən azı 5 stansiyada rabitə sistemlərinin yenilənməsi nəzərdə tutulur.
AİB bu layihə üçün 325 milyon ABŞ dolları həcmində maliyyə ayırmağı nəzərdən keçirir. Kreditin bankın Direktorlar Şurası tərəfindən təsdiqi 17 iyun 2027-ci ilə planlaşdırılıb.
Layihə, həmçinin Asiya İnfrastruktur İnvestisiya Bankı (AİİB) və Azərbaycan hökuməti tərəfindən birgə maliyyələşdiriləcək.
