Şirkət Twenty Edition adlı xüsusi buraxılışı təqdim edib. Bu versiya xüsusi dizayn elementləri ilə seçilir və Dynamic SE komplektasiyası əsasında hazırlanıb. İstehsal həcmi açıqlanmasa da, Böyük Britaniyada qiyməti 115,8 min funt sterlinq olaraq müəyyən edilib.
Yeni model üç kuzov rəngində təqdim olunacaq: qara Santorini, ağ Ostuni və 2004-cü ildə təqdim olunan Range Stormer konseptinə istinad edən narıncı Sanguinello. Avtomobil Black Exterior paketi, ön qanadlarda “Twenty” nişanları və qara və ya gümüşü rəngdə 23 düymlük disklərlə təchiz edilib.
Salon hissəsində Range Rover Sport SV modelindən götürülmüş qara Windsor dəri üzlüklü idman oturacaqları quraşdırılıb. İnteryer döymə karbon elementləri, işıqlı qapı astanaları və mərkəzi konsolda “Twenty” loqosu ilə tamamlanır. Tavan isə qara zamşa ilə işlənib.
Avadanlıqlar siyahısına ön oturacaqlar üçün isitmə, ventilyasiya və masaj funksiyaları, arxa oturacaqlar üçün isitmə və ventilyasiya, sükanın qızdırılması, iki zonalı iqlim nəzarəti, 18 dinamikli Meridian 3D audio sistemi, 13,7 düymlük rəqəmsal cihaz paneli və 13,1 düymlük mərkəzi ekran, simsiz şarj və digər funksiyalar daxildir.
Texniki baxımdan dəyişiklik yoxdur. Model 550 at gücünə malik qoşulan hibrid (plug-in hybrid) qurğu ilə təklif olunacaq və elektrik rejimində 100 km-dən çox məsafə qət edə biləcək.
