Qida sənayesində plastik tullantıların azaldılması və məhsulların yararlılıq müddətinin vizual təyini istiqamətində maraqlı bir innovasiyaya imza atılıb. TASS agentliyinin Moskva Təhsil və Elm Departamentinin mətbuat xidmətinə istinadən yaydığı məlumata görə, 10-cu sinif şagirdi Elxan Şabanov tamamilə qida komponentlərindən ibarət olan və məhsulun təzəlik dərəcəsini rəngini dəyişərək göstərən biodeqradasiya olunan (təbiətdə parçalanan) qablaşdırma plyonkası prototipi hazırlayıb.
Bu ixtira həm ərzaq israfının qarşısını almaq, həm də təbiətdə yüz illərlə qalan ənənəvi plastikləri əvəz etmək potensialına malikdir.
Yeni materialın əsas xüsusiyyəti onun tamamilə təbii, hətta yeməli komponentlərdən hazırlanması və mühitin turşuluq dərəcəsinə (pH səviyyəsinə) qarşı həssaslığıdır.
BMT-nin hesabatlarına görə, qablaşdırma sənayesi dünyada plastik çirklənməsinin ən böyük mənbəyidir. Bu cür orqanik və ağıllı plyonkaların sənaye miqyasına inteqrasiya edilməsi həm ekoloji mühiti qoruya bilər, həm də marketlərdə vaxtı keçmiş ət və balıq məhsullarının istehlakçılara satılması riskini sıfıra endirər.
MONETAR.AZ
