United Airlines şirkətinə məxsus təyyarə Nyuark Liberty Beynəlxalq Hava Limanına enişə yaxınlaşarkən yaxınlıqda yerləşən yolda avtomobilə və işıq dirəyinə toxunub. Hadisə bazar günü baş verib və bu barədə ABŞ Federal Aviasiya Administrasiyası (FAA) məlumat yayıb.
United aviaşirkətinin Venesiyadan (İtaliya) gələn 169 saylı reysi yerli vaxtla təxminən saat 22:00-da Nyu-Cersi şosesi üzərində yerləşən dirəyə dəyib, daha sonra isə təhlükəsiz şəkildə eniş edib. FAA və ABŞ Milli Nəqliyyat Təhlükəsizliyi Şurası (NTSB) hadisə ilə bağlı araşdırma aparır.
Təyyarə Boeing 767-400 modelidir və göyərtəsində 221 sərnişin və 10 ekipaj üzvü olub. Hadisə zamanı xəsarət alan olmayıb.
United Airlines bildirib ki, ekipaj uçuşlardan müvəqqəti kənarlaşdırılıb və texniki heyət təyyarənin mümkün zədələrini yoxlayır. Şirkət hadisə ilə bağlı geniş təhlükəsizlik araşdırması aparılacağını açıqlayıb.
