Çinin avtomobil istehsalçısı BYD üçüncü rübdə maliyyə nəticələrini yaxşılaşdırsa da, ilin ilk doqquz ayının yekunları şirkətin xalis mənfəətində azalma olduğunu göstərir. Eyni zamanda, xarici bazarlarda genişlənmə, ehtiyatların artması və investisiya xərcləri şirkətin maliyyə vəziyyətində diqqətçəkən dəyişikliklər yaradıb.
Şirkətin açıqladığı hesabatına əsasən, iyul–sentyabr aylarında səhmdarların payına düşən xalis mənfəət ötən ilin eyni dövrü ilə müqayisədə 28% artaraq 10,02 milyard yuana çatıb. Gəlirlər 13,6% yüksələrək 221,49 milyard yuan təşkil edib. Bir səhm üzrə mənfəət də 29% artımla 1,10 yuana yüksəlib.
Birdəfəlik maddələr nəzərə alınmadıqda BYD-nin mənfəəti 25% artaraq 8,63 milyard yuan olub. Hesabat dövründə əməliyyatdankənar maddələr şirkətin nəticələrinə əlavə 1,39 milyard yuan töhfə verib. Bu məbləğə maliyyə aktivlərinin ədalətli dəyərindəki dəyişikliklərdən əldə edilən 1,13 milyard yuanlıq mənfəət, eləcə də əsasən avtomobil fəaliyyəti ilə əlaqəli 825 milyon yuan dövlət subsidiyası daxildir.
Üçüncü rübdə qeydə alınan artıma baxmayaraq, yanvar–sentyabr dövründə şirkətin maliyyə göstəriciləri fərqli mənzərə ortaya qoyub. Bu müddətdə BYD-nin gəliri cüzi dəyişərək 566,30 milyard yuan səviyyəsində qalıb. Xalis mənfəət isə illik müqayisədə 4,2% azalaraq 22,34 milyard yuana enib.
Müsbət dinamika əməliyyat fəaliyyətindən əldə edilən pul vəsaitlərinin hərəkətində müşahidə olunub. Doqquz ay ərzində əməliyyat pul axını 33% artaraq 54,47 milyard yuana çatıb.
Bununla belə, valyuta məzənnələrindəki dəyişikliklər və investisiya əməliyyatları şirkətin maliyyə nəticələrinə təzyiq göstərib. Ötən ilin eyni dövründə 2,94 milyard yuan mənfəət qeydə alınan maliyyə xərcləri üzrə göstərici bu il 7,37 milyard yuana çatıb. İnvestisiya gəliri isə maliyyə aktivlərinin silinməsi və ticarət aktivlərinin satışından yaranan itkilərin təsiri ilə 88% azalaraq 247 milyon yuan olub.
BYD-nin balans göstəriciləri şirkətin beynəlxalq bazarlarda böyüməsinin maliyyə resurslarına olan tələbatı artırdığını göstərir. Əsasən xarici avtomobil satışlarının genişlənməsi fonunda mal ehtiyatlarının dəyəri 2025-ci ilin sonu ilə müqayisədə 60% artaraq 221,58 milyard yuana yüksəlib.
Ticarət debitor borcları da eyni dövrdə 53% artaraq 56,47 milyard yuan təşkil edib. Bu göstəricilər satışların genişlənməsi ilə yanaşı, şirkətin dövriyyə kapitalına olan ehtiyacının da artdığını nümayiş etdirir.
İnvestisiya layihələrinin genişlənməsi tikintisi başa çatmamış aktivlərin həcminə də təsir edib. Belə ki, bu göstərici 64% artaraq 79,18 milyard yuana çatıb.
BYD genişlənməni maliyyələşdirmək üçün borc alətlərindən də istifadə edib. Şirkətin ödənilməli olan buraxılmış istiqrazlarının həcmi iki dəfə artaraq 15 milyard yuana yüksəlib. Bunun əksinə olaraq, qısamüddətli borclanmalar 50% azalaraq 18,67 milyard yuana düşüb.
Avtomobil biznesində müştərilərdən alınan avans ödənişlərini əks etdirən müqavilə öhdəliklərində də əhəmiyyətli artım qeydə alınıb. Bu göstərici 81% yüksələrək 92,95 milyard yuan təşkil edib.
Şirkətin ümumi aktivləri isə 2025-ci ilin sonu ilə müqayisədə 7,4% artaraq 948,94 milyard yuana çatıb.
Beləliklə, BYD üçüncü rübdə mənfəət və gəlir artımına nail olsa da, doqquz aylıq nəticələr valyuta itkilərinin, investisiya əməliyyatlarının və genişlənmə ilə bağlı maliyyə ehtiyaclarının şirkətin ümumi göstəricilərinə təsir etdiyini göstərir. Qarşıdakı dövrdə satış artımının pul axınına çevrilməsi və xarici bazarlardakı genişlənmənin maliyyə səmərəliliyi şirkətin nəticələri baxımından əsas məqamlardan biri olacaq.
MONETAR.AZ
