Hüseyn Cavid prospekti və Ayna Sultanova küçəsinin bir hissəsində nəqliyyatın hərəkəti məhdudlaşdırılıb.
Bakı şəhərində aparılan irimiqyaslı yol-təmir işləri səbəbindən paytaxtın mərkəzi küçə və prospektlərindən keçən 7 müntəzəm avtobus marşrutunun hərəkət sxemində müvəqqəti dəyişiklik edilib.
Bu barədə Azərbaycan Yerüstü Nəqliyyat Agentliyi (AYNA) rəsmi məlumat yayıb.
Agentliyin məlumatına görə, müvafiq dövlət qurumları tərəfindən paytaxtın iki mühüm nöqtəsində təmir-bərpa işlərinə başlanılıb. Bu səbəbdən aşağıdakı istiqamətlərdə nəqliyyat vasitələrinin hərəkətinə tam məhdudiyyət tətbiq olunub:
-
Hüseyn Cavid prospektində — Seyfəddin Dağlı küçəsindən Mikayıl Müşfiq küçəsinədək olan hissə;
-
Ayna Sultanova küçəsində — Hüseyn Cavid prospektindən Mətbuat prospektinədək olan hissə.
Yaranan məhdudiyyətlə əlaqədar olaraq, gün ərzində minlərlə sərnişin daşıyan aşağıdakı marşrut xətlərinin hərəkəti alternativ yollara yönləndirilib:
-
№3, №6, №10, №18, №39, №77 və №206 nömrəli müntəzəm avtobuslar.
Qeyd olunan marşrutlar üzrə hərəkət edən avtobuslar təmir müddətində müvəqqəti olaraq bu yollardan istifadə edəcəklər:
-
Mətbuat prospekti
-
Məmməd Rahim küçəsi
-
Qurban Xəlilov küçəsi
-
Ələsgər Ələkbərov küçəsi
Sürücülərdən və ictimai nəqliyyat istifadəçilərindən hərəkət planlarını bu dəyişikliklərə uyğun tənzimləmələri xahiş olunur.
