Hörmüz boğazında tankerlərə hücumlar Avropada qazı bahalaşdırıb

Hörmüz boğazında tankerlərə hücumlar

Avropada təbii qazın topdansatış qiymətləri bu gün qlobal neft bazarındakı enişdən fərqli istiqamətdə hərəkət edərək yüksəlib. Buna qış mövsümü üçün tədarük riskləri və Yaxın Şərqdə davam edən geosiyasi gərginlik təsir göstərib.

Niderlandın TTF birjasında ən yaxın ay üzrə qaz fyuçersləri 1,41% bahalaşaraq meqavat-saat üçün 85,85 avroya çatıb. Britaniyanın NBP göstəricisi isə 1,31% artaraq term üçün 213,88 pens təşkil edib.

Avropa İttifaqının qaz anbarlarının 70,4%-nin dolu olmasına və fiziki tədarükün hələlik nisbətən sabit qalmasına baxmayaraq, treyderlər mümkün təchizat risklərini qiymətlərdə nəzərə almağa davam edirlər.

Bunun əksinə olaraq, Beynəlxalq Enerji Agentliyinin (BEA) qlobal bazarda neft təklifinin artacağına dair proqnozları fonunda neft ucuzlaşıb. Avropa ticarətinin əvvəlində Brent markalı neftin fyuçersləri 44 sent və ya 0,5% azalaraq bir barel üçün 92 dollara, WTI fyuçersləri isə 0,41% geriləyərək 85,37 dollara düşüb.

Bununla belə, Fars körfəzindəki gərginlik enerji bazarlarında qeyri-müəyyənliyi artırmaqda davam edir. Ötən həftəsonu tankerlərlə bağlı baş verən yeni insidentlər Yaxın Şərqdən enerji ixracı üçün risklərin hələ də yüksək olduğunu göstərib.

Xüsusilə Hörmüz boğazı ətrafındakı vəziyyət treyderlərin diqqət mərkəzindədir. Regionda enerji infrastrukturuna və kommersiya gəmilərinə mümkün hücumlar qlobal enerji tədarükünün əsas tranzit marşrutlarından biri ilə bağlı narahatlıqları gücləndirir.

Avropanın enerji şirkətləri və hedcinq bölmələri üçün bu vəziyyət qış mövsümündə qaz təminatının xarici geosiyasi şoklara həssaslığını artırır. Buna görə də neft bazarında ucuzlaşma müşahidə olunsa belə, qaz treyderləri geosiyasi riskləri qiymətlərdən tam çıxarmağa tələsmirlər.

MONETAR.AZ