Platin qiymətləri kəskin yüksəlib. Buna səbəb Çin birjalarından birində bu metal üzrə yeni fyuçers kontraktının işə düşməsi olub. Hadisə dünyanın ən böyük xammal istehlakçısı olan Çində tələbin artacağına dair nikbinliyi gücləndirib, — deyə Bloomberg bildirir.
London spot qiymətləri 3,8% artaraq bir unsiya üçün 1 650 dollara yaxınlaşıb. Bu, son bir aydan artıq müddətdə qeydə alınmış maksimum göstəricidir. Çində isə reaksiyalar daha güclü oldu: iyun təhvüllü kontraktlar (Guangzhou Futures Exchange-də ticarətə açılan) bir anda 12% bahalaşdı, daha sonra isə müəyyən dərəcədə geri çəkildi.
Yeni kontraktlar fiziki təhvil müddəasını nəzərdə tutur və həm institusional, həm də pərakəndə investorlar üçün əlçatandır — bu isə bazar iştirakçılarının dairəsini xeyli genişləndirir. Bundan əlavə, birja anbar ehtiyatları üzrə gündəlik hesabatlar açıqlayacaq ki, bu da Çin bazarında real vəziyyətin qiymətləndirilməsi üçün nadir imkan yaradır.
Kontraktın işə düşməsindən əvvəl Çin idxalı kəskin artırmışdı. Oktyabr ayında platin idxalı 10,2 ton təşkil edib. Bu, ötən ilin eyni dövrü ilə müqayisədə iki dəfədən çoxdur.
İlin əvvəlindən bəri platin 70%-dən çox bahalaşıb, qiymət dinamikasına görə gümüşlə oxşarlıq göstərərək qızılı xeyli geridə qoyub. Cənubi Afrikadan (əsas istehsalçılardan biri) tədarüklərin pozulması fonunda bazar ardıcıl üçüncü il illik qıtlıqla üzləşir.
Bundan başqa, ABŞ-ın platinə tarif tətbiq edə biləcəyi ilə bağlı ehtimallar vəziyyəti daha da gərginləşdirir. Bu, həcmlərin ABŞ-a yönəlməsinə və digər regionlarda əlavə qıtlıq yaranmasına səbəb olur.
MONETAR.AZ
