Polestar-in baş icraçı direktoru Mixael Loşeller ötən cümə günü bildirib ki, hazırda Avropa şirkətin artımının əsas hərəkətverici qüvvəsidir və il üzrə ümumi satışların 78%-ni təmin edir.
Loşellerin sözlərinə görə, eyni dövrdə elektromobil istehsalçısının ümumi satışlarının cəmi 7%-i ABŞ-ın payına düşüb.
“Avropa biznesimizin təməlidir və biz Avropa ilə işimizi hələ bitirməmişik, əksinə yalnız sürəti artırırıq”, deyə Loşeller qeyd edib.
Baş icraçı direktor şirkətin satış şəbəkəsi strategiyasını daha da genişləndirməyi planlaşdırdıqlarını bildirib. Avropadan başqa, Loşeller Cənubi Koreya, Avstraliya və Kanadanı da Polestar üçün digər vacib bazarlar kimi qeyd edib.
Polestar-in pərakəndə satış nöqtələrini bağladığı Çinlə bağlı Loşeller bu ölkəni “hiperrəqabətli bazar” kimi xarakterizə edib. O vurğulayıb ki, “məhdud resurslara malik İsveç brendi” olaraq şirkət oradakı mövcudluğu ilə bağlı strateji qərarlar qəbul edib, lakin əlavə edib ki, gələcəkdə Çini “həmişə yenidən qiymətləndirəcəklər”.
Polestar 1996-cı ildə Flash Engineering adı ilə təsis edilmiş İsveç avtomobil brendidir. Daha sonra şirkət Polestar Racing adlandırılıb və 2015-ci ildə Volvo Cars tərəfindən satın alınıb. Baş ofisi İsveçin Qöteborq şəhəri yaxınlığındakı Torslandada yerləşir. Avtomobilləri Çində istehsal olunur; burada Volvo-nun ana şirkəti olan Geely fəaliyyət göstərir.
MONETAR.AZ
