Azərbaycan və Çexiya arasında iqtisadi əməkdaşlıq və ikitərəfli ticarət əlaqələri müsbət dinamika nümayiş etdirir. 2025-ci ildə iki ölkə arasında ticarət dövriyyəsi 800 milyon dolları ötüb, 2026-cı ilin yanvar-avqust aylarında isə təxminən 760 milyon dollar təşkil edib.
AZƏRTAC -ın məlumatına görə, bu barədə Azərbaycan nümayəndəsi Yusif Abdullayev Azərbaycan-Çexiya biznes forumunda çıxışı zamanı bildirib.
Onun sözlərinə görə, xam neft Azərbaycanın Çexiya bazarına əsas ixrac məhsulu olaraq qalır. Cari ilin ilk səkkiz ayında Çexiyaya neft ixracının dəyəri 700 milyon dolları ötüb.
Çexiya Azərbaycanın əsas ticarət tərəfdaşları arasında 8-ci, ixrac istiqamətləri sırasında isə 5-ci yerdə qərarlaşıb.
Bununla yanaşı, Azərbaycan məhsullarının Çexiya bazarında mövqelərinin genişləndirilməsi üçün də imkanlar mövcuddur. Gübrələr, metanol, alüminium, eləcə də bəzi meyvə və tərəvəzlər ixrac potensialı yüksək olan məhsullar sırasındadır.
İki ölkə arasında ticarət dövriyyəsinin həcmi iqtisadi əlaqələrin inkişafını göstərsə də, ixracın əsasən xam neft üzərində cəmləşməsi qeyri-neft məhsullarının tədarükünün genişləndirilməsi üçün əlavə imkanların olduğunu göstərir. Bu istiqamətdə əməkdaşlığın inkişafı Azərbaycan məhsullarının Avropa bazarlarında çeşidinin artırılmasına töhfə verə bilər.
