“Bakı Metropoliteni” QSC iyunun 16-dan etibarən qatarların hərəkətində yay qrafikinin tətbiqinə başlayır. Qurumun rəsmi açıqlamasına görə, bu mövsümi addım məktəblərdə və ali təhsil ocaqlarında tədris ilinin başa çatması, həmçinin kütləvi məzuniyyət dövrünün başlanması ilə əlaqədardır. Sərnişin sıxlığının azalması fonunda qatarların hərəkət intensivliyi optimallaşdırılacaq.
Yeni qrafikə əsasən, iş günlərinin pik saatlarında “28 May” – “Əhmədli” sahəsində qatarların hərəkət intervalı 2 dəqiqə 18 saniyə, şənbə günləri 2 dəqiqə 30 saniyə, bazar günləri isə 3 dəqiqə təşkil edəcək.
Bununla yanaşı, Bənövşəyi xəttdə, həmçinin “Cəfər Cabbarlı” – “Xətai” və “Əzi Aslanov” – “Əhmədli” sahələrində qatarların hərəkət qrafiki dəyişməz qalacaq.
İntervalların artırılması Bakı metrosunun yalnız xüsusi yük düşən sahələrinə aid edilib və hərəkətin intensivliyi sərnişin tələbatına tam cavab verəcək səviyyədə saxlanılıb. Bununla belə, qrafikin qüvvədə olduğu müddətdə operativ idarəetmə qrupu xətlərdə hər hansı lokal sıxlığın qarşısını almağa tam hazır vəziyyətdə olacaq.
