Avropa istehsalçıları süni intellekt və digər texnoloji innovasiyalar sahəsində qlobal liderlərdən geri qalsalar da, humanoid robotlar bazarında rəqabət qabiliyyətini qoruyub saxlayırlar. Bu barədə Bloomberg yazır. Bir çox Avropa şirkətləri yeni modellər hazırlayır və robotları istehsalata uğurla tətbiq edir.
Fiziki cəhətdən ağır işlərdə insanı əvəz edə bilən, əmək xərclərini azaldan və əhalinin qocalmasının təsirini kompensasiya edən humanoid robotlara maraq uzun müddətdir mövcuddur. Lakin bu maraq 2026-cı ilin yanvarında CES 2026 sərgisi zamanı pik həddə çatdı.
Bu sərgidə Hyundai özünün Atlas adlı robotunu təqdim etdi. Onun çıxışı o qədər təsirli oldu ki, növbəti iki həftə ərzində şirkətin səhmləri 80% artdı.
Hyundai robot istehsalında aparıcı şirkətlərdən biridir. Avtomobil və komponent istehsalçıları üçün humanoid robotlar nisbətən tanış texnologiyadır, çünki onlar elektrik avtomobillərinə bənzər komponentlərdən — batareyalar, mühərriklər, sensorlar və süni intellektə əsaslanan proqram təminatından ibarətdir.
Humanoid robot texnologiyasının avtomobil sənayesi ilə bağlı şirkətlər üçün əlçatan olması Avropanın bu sahədə əsas oyunçulardan birinə çevrilməsinə səbəb olub. Avropanın avtomobil istehsalçıları və əlaqəli şirkətlər robot texnologiyalarına ciddi maraq göstərirlər.
Məsələn, Bosch və Schaeffler Almaniyanın Neura Robotics şirkətinə investisiya yatırıb. Bu şirkət səs tanıma kimi xüsusiyyətlərə malik robot manipulyatorlar istehsal edir. Eyni zamanda, şirkət 4NE1 adlı humanoid robot hazırlayıb ki, onun 100 kq-a qədər yük qaldıra bildiyi və insanlarla təhlükəsiz işləyə bildiyi bildirilir.
Schaeffler-in baş direktoru Klaus Rosenfeld humanoid robototexnikanı şirkət üçün əsas inkişaf istiqamətlərindən biri kimi qiymətləndirib. Onun sözlərinə görə, lazer texnologiyaları, kompakt reduktorlar və elektrik mühərriklərinin inteqrasiyası kimi baza texnologiyalar artıq şirkət üçün yaxşı tanışdır.
Digər diqqətəlayiq nümunə İsveçin Hexagon şirkəti və onun Aeon robotudur. Şirkət bu robotu 2026-cı ilin sonuna qədər bazara çıxarmağı planlaşdırır. Hazırda isə robot BMW və İsveçrənin Pilatus Aircraft kimi müştərilərdə test edilir. Artıq BMW-nin Leypsiq zavodunda Aeon yüksək gərginlikli batareyaların yığılması və istehsal mərhələləri arasında komponentlərin daşınması üzrə öyrədilir.
Avropa şirkətlərinin uğurlarına baxmayaraq, onlar Çin tərəfindən ciddi rəqabətlə üzləşə bilər. Çin hökuməti “təcəssüm olunmuş süni intellekt”in inkişafını strateji prioritet elan edib.
Stokholmda yerləşən ölçmə texnologiyaları qrupunun robototexnika üzrə rəhbəri Arnaud Robert Bloomberg-ə bildirib ki, Çində təxminən 150 robot istehsal edən şirkət fəaliyyət göstərir. Onların əksəriyyəti istehlak bazarına yönəlsə də, sənaye sektoruna keçid sürətlənir.
Məsələn, Xiaomi artıq humanoid robotlarını zavodlarda test etməyə başlayıb və yaxın beş il ərzində onların geniş miqyasda tətbiqini planlaşdırır. UBTech isə robotların sənaye sektorunda tətbiqini aktiv şəkildə genişləndirir.
MONETAR.AZ
