Cənubi Koreyanın texnologiya nəhəngi Samsung Electronics, süni intellekt (AI) texnologiyalarına artan tələbin yaratdığı qlobal yarımkeçirici qıtlığı fonunda Vyetnamda ilk çip sınaq (test) zavodunun inşasına hazırlaşır. Reuters agentliyinin şirkətin daxili sənədlərinə istinadən yaydığı məlumata görə, investisiya layihəsinin ümumi dəyəri təxminən 39 trilyon donq (1,5 milyard dollar) təşkil edir.
Zavodun tikintisinə artıq paytaxt Hanoydan 60 kilometr şimalda yerləşən Taynquyen vilayətindəki sənaye parkında başlanılıb. Müəssisənin 2027-ci ilin noyabrında tam gücü ilə fəaliyyətə başlaması planlaşdırılır.
Yeni zavodun əsas fəaliyyət istiqaməti yeni AI çipləri yox, məhz bazarda ciddi qıtlığı hiss olunan əvvəlki nəsil DRAM və NAND yaddaş mikrosxemlərinin sınaqdan keçirilməsi olacaq.
Dünyanın nəhəng çip istehsalçıları öz mövcud konveyerlərini və istehsal güclərini tamamilə süni intellekt sistemləri üçün nəzərdə tutulan yüksək məhsuldarlıqlı komponentlərə yönəldiblər. Bu səbəbdən standart elektronika, smartfon və kompüterlər üçün lazım olan əvvəlki nəsil yaddaş çiplərinin qlobal tədarükündə ciddi boşluqlar və defisit yaranıb.
Sənədə əsasən, zavodun illik istehsal gücü:
- 153,3 milyard giqabit DRAM çipi
- 255,6 milyard giqabit NAND çipi olacaq.
Sənəddə həmçinin qeyd olunur ki, Samsung Electronics gələcəkdə bu müəssisədən əldə edəcəyi mənfəəti ölkədə ikinci böyük zavodun tikintisinə reinvestisiya etməyi planlaşdırır. Həmin genişlənmə layihəsinin isə 2,5 milyard dollara başa gələcəyi proqnozlaşdırılır.
Son illərdə Vyetnam qlobal yarımkeçirici sənayesinin xüsusilə "qablaşdırma və test" (packaging and testing) mərhələsində dünyanın ən cəlbedici habına çevrilib. Hazırda bu ölkədə Samsung-la yanaşı, ABŞ-ın mühüm texnologiya nəhəngləri olan Intel və Amkor Technology kimi qlobal korporasiyaların da irimiqyaslı istehsal və sınaq müəssisələri fəaliyyət göstərir.
MONETAR.AZ
