Qlobal texnologiya sektorunda süni intellekt sahəsində fəaliyyət göstərən iri şirkətlər arasında yeni maliyyə yarışının başladığı bildirilir. OpenAI, Anthropic və SpaceX kimi nəhənglərin birjada səhmlərini satışa çıxarmaq və ya ilkin kütləvi yerləşdirmə (IPO) planları üzərində işlədiyi açıqlanıb.
Məlumata görə, OpenAI artıq ABŞ Qiymətli Kağızlar və Birja Komissiyasına (SEC) məxfi şəkildə IPO üçün sənədlər təqdim edib. Şirkət hələlik dəqiq tarix açıqlamasa da, gələcəkdə birja listinqinə çıxma ehtimalını təsdiqləyib.
Analitiklər qeyd edirlər ki, süni intellekt sektorunda fəaliyyət göstərən şirkətlər arasında rəqabət son aylarda daha da güclənib. Həm OpenAI, həm də Anthropic-in özəl investorlardan aldığı qiymətləndirmələrin 1 trilyon dollara yaxınlaşdığı bildirilir.
Bazar məlumatlarına görə, SpaceX-in də birja debütü hazırlıqları investorların diqqət mərkəzindədir və şirkətin dəyəri təxminən 1,7 trilyon dollar səviyyəsində qiymətləndirilir.
Mütəxəssislər bildirirlər ki, bu şirkətlər üçün əsas maliyyə yükü süni intellekt modellərinin hazırlanması, təlimi və istifadəçi xidmətlərinin təmin olunması üçün tələb olunan yüksək hesablama gücüdür. Bu səbəbdən IPO-lar əlavə kapital cəlb etmək üçün mühüm addım kimi qiymətləndirilir.
Ekspertlərin fikrincə, bu nəhəng texnologiya şirkətlərinin birjaya çıxışı təkcə onların deyil, ümumilikdə süni intellekt sektorunun gələcək dəyərinin formalaşmasında mühüm rol oynayacaq.
